Bill Gates-an eng nge a hlauh?

Mi tin hian eng emaw hlauh zawng tak mai kan nei ṭheuh a, Bill Gates pawh hian hlauh eng emaw riau chu a nei. Mahse Bill Gates-a hlauh hi phobia lam thil erawh a ni lo a, khawvela thil thleng atana a duh loh, thleng lo se, a tih a sawina a ni.

Vox-in an kawmnaah Bill Gates hian mihring chunga thil thleng tura a hlauh a sawi chhuak. "Nuclear indona hi chu ka nunah hian ka hlau lo a, a thlen theihna chance pawh hi ka dah hniam hle a ni," a ti. Nuclear indona, mi tam takin an hlauh leh an ṭih em em chu a hlau ve vak lo.

Bill Gates-an a hlauh ber thung erawh chu khawvelah hian hripui a leng ang tih hi a ni.

"Kan hmalam hun hla vak loah hian hripui hi chhuak thut thei, thleng thut thei a ni a, Ebola aia hlauhawm leh thihpui awlsam zawk hi khawvelah a leng ang tih ka hlau hle a ni," a ti. Khawvel huapa hripui leng hnuhnung ber chu Indopui I zawh hnua influenza hripui tia Mizotena kan sawi kha a ni a, kha hripui avang khan khawvel pumah mi maktaduai 20 aṭanga 40 inkar vel zet an thi a, Mizoramah pawh chhungkaw tam tak an mang phah a ni.

"Tunhma ai khan tunlai khawvelah hian hripui lên leh darh chakna chance a sang leh zual. Khatih hunlai, influenza hripui a len hunlai ai khan tunlai khawvelah hian mi kan inchiah piah lehzual a, ramri kâna intlawhpawh hi khang hunlai ai khan a lêt 50 zetin an tam tawh zawk a ni," a ti.

Bill Gates chuan khatiang hri­pui kha leng leh se chuan ni 250 chhung lekin mi maktaduai 33 zet an thi hman tawh ang tiin a sawi bawk.