Underwood-in Idol kum 10 a lawm

American Idol-a Carrie Underwood pakhatna a nihna kha a la rei vak lo angin a lang na a, kum 10 lai a lo liam ve leh tawh. Underwood hian American Idol season 4-a pakhatna a nih hi Thawhṭanni khan a lawm. Kum 2005 khan a larna album 'Some Hearts' a tichhuak a, a hlawhtlinpui hle; he album-a mi 'Jesus Take the Wheel' phei chu Kristiante zingah chauh ni loin, khawvel mipuiin an duh hle a ni.

American Idol aṭang hian country music khawvela hmeichhe hlawhtling berte zingah a rawn lang chhuak a ni. He kum sawm chhung hian Grammy pasarih ngawt a dawng a, Billboard Music Awards pawh 17 lai a la tawh a, Academy of Country Music Awards pawh 11 lai a dawng tawh a ni. Tunah hian National Hockey League player hlawhtling leh lar Mike Fisher nen an innei a, an fa hmasa ber, Isaiah chu kumin khan a piang a ni.