Fashion Fiesta
Khawthlang ram America-a fashion lam panga tui mite leh designers-te ngaihhlut leh ngaih pawimawh CFDA Fashion Awards-a zaithiam lar leh pian thiam tak mai Rihanna-in thawmhnaw dangdai tak mai, a taksa ruangam langtlang deuh thaw, a chhip aṭanga a ke ler thlenga tle sep sep, mi mit la em em mai, Red Carpet-a a rawn hak chhuah ṭum khan mite ngaihven a hlawh hle a, a ruangam mawina ai maha miten an ngaihven tak zawk chu a thawmhnaw pum maia lunghlu ṭha mi ni awm ziazanga chei khah vek, tle mawi em em mai kha lunghlu tak tak nge ni a, tu siamchhuah nge? tih kha khawvel ngaihven a ni ta zawk a. Rihanna hian a larpui ta zawk nge? A thawmhnaw siamchhuaktu hian a hlawkpui ta zawk tih chu buk tham tak a ni. Adam Selman hian hemi ṭuma a thawmhnaw duan chhuahah hian lunghlu ṭha mi nuai tam tak man a bel khawm hi a larpui ta hle a ni.
Hei hi a tawpna ni lovin incheina khawvela a cheimawina lamah bung thar min kaipui ta hlawk a ni. Hemi hma zawng hian designers lian ṭhenkhat Chanel, Balenciaga leh Christian Dior ten an thawmhnaw tam takah heng lunghlu nalh tak tak hi lo hmang fo tawh ṭhin mah se mite ngaihven a hlawh lutuk ngai lem lo. Heng lunghlu ṭha mi Swarovski Crystal tia a tam zawkina kan hmelhriat hi hun rei tak aṭang khan incheina khawvelah nasa takin kan lo hmang ṭangkai tawh ṭhin a. Amaherawhchu, mite ngaihven a hlawh chhoh tak tak hi chu tun kum hnih thum kalta aṭang chauh khan a ni. Hemi ṭuma Rihanna-ina Swarovski lunghlua chei, a chhip aṭanga a ke ler thlenga a inbel tak hnu phei hi chuan nasa takin a larin mite hlut a hlawh sawt a ni.
Ṭhenkhat chuan kawr cheimawina satliah angin kan lo hmelriat a ni mai thei, a din tirh lai kha chuan in chhung cheina leh tarmawi eng ilo vel atana duan chhuah a ni zawk mah a, amaherawhchu 1920 chhoah chuan in chhung bungrua mai ni lo, incheina khawvelah seng luh a lo ni ta a ni. Daniel Swarovski, Bohemian mi chuan kum 21-mi lek a nih laiin heng lunghlu chei bawl dan hi hmuchhuakin, 1892 khan bul a ṭan a, kum 3 a liam meuh chuan Wattens, Austria-ah insuanin, vawiina khawvelin kan hmelhriat tak Swarovski Crystal Company hi a lo din chhuak ta a ni. Mi tam takin an rin dan lo deuhin, Swarovski hi a laih a laih chhuah ni lovin, Wattens-a an Factory chhung ngeia siam chhuah a ni ṭhin. A tlet dan te, a cut dan tur te leh a rawng turte hi Daniel Swarovski hian a duan chhuah vek an ni a, amah hi dam tawh lo mah se tun hunah chuan he Company hi a tuchhuan, Sadja leh firm lian tak tak inzawm khawmin he Company hi an enkawl mek a ni. Tunah chuan thawktu ringawt pawh singhnih chuang nei tawhin Swarovski hnuaiah hian line hrang hrang an siamchhuak tawh a ni. 1913 khan puanthan dangdai tak Swarovski Crystal hmanga chei tlet an siamchhuak a, designer lian tam zawkin an intihhmuh nasa hle a ni. Hei bakah hian Phillips Company nen inremna siamin Memory Card, Pen Drive leh Bluetooth Wireless Earphones Swarovski Crystal-a cheimawi te an siamchhuak bawk. Hei mai bakah hian Swarovski Sedar Curtains an tih mai, khawvel mi hausa tawntaw ho leh lal in te, sorkar miliante leh khawvel Hotel changkang te cheimawi nan duan chhuah a ni bawk. 1999-a an hmuhchhuah erawh incheina khawvelah kan hmang ṭangkai ta hle a, Crystal Tatoos an tih mai, a hranpaa chilh beh ngai tawh lova a bela bel chi pawh hi thawmhnaw siamchhuaktu ten an hmang ṭangkai ta hle a ni.
Thawmhnaw mai ni lo, ṭhi leh zungbunah te leh bag leh pheikhawkah te lam Swarovski Crystal hian hmun a chang chho ta zel a, hetia mite hlut a nih chhoh tak zelah hian lo entawn a, a lem hmuh tur pawh a tam chho ta tual tual a, India ramah ngei pawh Show Room te hmuh tur a awm ve ta hial a. Henga kan lei sual palh loh nana hriat tur pakhat chu Fire Mountain Gems and Beads-te hi Official distributors an ni a, anmahni kaltlang lo hi chu atlangpuiin a lem a ni duh khawp mai. Hei baka awlsam deuha hriat theih dan pakhat chu a Crystal kha han enchiang la, puarpawleng/phuan ang chi hi a awm ve ngai lo a, a te emaw a lian emawah a cut dan a inan vek avangin a tlet dan hi a inang vek a ni.
Tluangpuii Hmar
Instructress
Vakiria Institute of Fashion Technology