Ṭhazual Awards hmasa ber an sem chhuak ta

TBCA, Pensy, DJ, Grace, Essy, Chris-a, C. Sanga ten award an dawng a, zaithiam leh performer ten awarg show-a an che a hmuhnawm

Ningani zan dar 8 khan Lal Thanhawla Auditorium, Treasury Square-ah Ṭhazual Awards hmasa ber chu sem a ni a, programme felfai tak hnuaiah award show hmuhnawm tak nen he hun hi hman a ni.
Ṭhazual Awards-ah hi Zonuni'n a host a, zaithiam zai an ṭha a, hla thar kan ngaithla nual a, he huna kal a tihlu zual hle. Power supply avangin a tir lam duh angin a kal thei lo a, mahse a pangngai thuai e.
MSL Dance Battle neih taka finalist, Myn'X-in lâmin he show hi an rawn hawng a, TBC-an 'Fak zel che ka duh' tih hla hmangin bul a rawn ṭan a, he hla hmang hian TBC-a hi Rin Rin Best Male Artist (Gospel) nominee-a a lang a, he hla avang hian he title, Best Male hi a dawn phah nghe nghe. Zaithiam zai tura tih mi pariat an awm a, pasarihin an tihlawhtling thei. Hlimhlimi, Grace, Hmingtea, Essy, DJi leh C. Sanga te an zai hlawm.
Hla thar an rawn sa nual a, award semnaa kalte tan vanneihna a ni. C. Sanga hla thar 'Min bin, min bân...' a nalh a, a dangdai a, ngaihthlak a nuam; Best Male Artist (Lengzem) dawng tur âwm tak niin a lang. C. Sanga chuan 'Ka ṭhianpa phuah a ni a, eng emaw zûnah, ama duh thu ngeiin a tâng a, chu a thil ngaih chuan a bin a, a bân a...," a ti. C. Sanga hla sak hi 'Thlemna Duhawm' tih a ni. DJ Lalvenhimi hla sak, "Ka tling lo'' tih kha hla thar bawk a ni a, John Mawitei & Mapuii Fanai Collection-a mi tur a ni. Hlimhlimi'n 'I hnenah ka lo kir' tih hla a sa a, he hla hi hla thar tak chu a ni lo nachungin amah Hlimhlimi tan hla thar kan ti thei ang. Parema phuah a ni a, hla ṭha tak a ni a, a music a changkangin a nalh hle a, amah pawhin a sa thiam hle.
Rampum huapa Faklam Intihsiak neih taka pakhatna, Ramthar Veng Branch KTP ten faklâm an entir a, a hmuhnawm a, an thiam hle.
Hmingtea a rawn che ropui hle a, dance crew ṭhahnem tak nen stage-a a zai mai baka an che kha a hmuhnawm hle. Performer ropui tak a ni. Essy pawhin a hla hit, award a dawnna hla 'Inchhuang mai lo la' a rawn sa a, a thiam hle. Grace-in a hla thar 'Rorelna ni' a rawn sa bawk. Grace hian he hla hi hun rei vak loah music video-in a tichhuak ang.

Ṭhazual Awards hmasa ber winner list
RIN RIN BEST MALE ARTIST (GOSPEL)
TBC Zaithanpuia – Fak zel che ka duh

NATIONAL BUSINESS ENTERPRISE BEST FEMALE ARTIST (GOSPEL)
Pensy B Lalthangliani – Nitinin hmangaih che ka duh

IC BIG BAZAR BEST MALE ARTIST (LENGZEM)
C Sanga – Lt a mak ka ti

SAMSUNG 3:16 PLAN SOLUTION BEST FEMALE ARTIST (LENGZEM)
DJ Lalvenhimi – Liam mai rawh

VOGUE BEST NEW ARTIST (GOSPEL)
Grace Lalchhanhimi – Ka thinlung chelhtu

MD ENTERPRISE BEST NEW ARTIST (LENGZEM)
Essy – Inchhuang mai lo la

RORO POLYMERS BEST MUSIC VIDEO
Chris-a – Kawng min hawn ru