Instagram-ah live location sharing tih theih

Social media platform lar, Instagram chuan feature thar a rawn siam belh zel. Live location sharing a tih theih ve leh ta a, mahse hei hi DM-a private emaw, group emaw ah chauh share theih a ni a, darkar khat hnuah a tawp zui ang.

Hei bakah DM-a hman theih sticker pack 17, sticker thar 300 chuang awmna a dah thar bawk. Hei hi Instagram app update in a rawn awm mai dawn a ni.

User-ten DM kaltlangin anmahni leh an ṭhiante chu hminglem, nickname an siamsak thei dawn bawk. Mahse he hming lem hi DM chat-ah chauh a lang dawn a, original user name chu a danglam phah dawn chuang lo.

Live location sharing hi tourist spot leh music concert emaw, punkhawm tamna hmun dangah pawh ṭhiante leh chhungte nena in hloh palhin a ṭangkai hle turah ngaih a ni. DM chauha share theih niin, midangah forward theih a ni lo. Feature tharte hi user zawng zawngin an la hmang thei lo thung a, a tahtawlin chhawp chhuah zel tum a ni.

Instragram hi khawvela social media platform lar ber zinga mi a ni a, active user hi mi tluklehdingawn 2 chuang an awm tawh. A hman a awlsam avang hian hmangtu hi an pung chak nia ngaih a ni. Kum 2020-a reels an siam aṭang phei chuan hmangtu hi an pung chak hle a ni.