Maggie leh TBC-a music video thar

Inrinni khan Maggie leh TBC-a te music video thar chu Zosaphluia Building, Synod Compund, Mis­sion Vengah Synod Moderator Rev. Lalrinmawia'n a tlangzarh.

Maggie leh TBCa- te duet-na hla hi ruihhlo dona hla a ni a, mipuite hnenah ruihhlo hlauhawmzia zirtirna lam hla a ni. Hla hming hi 'Engtin ngai maw?' tih hla a ni a, Robert-a phuah a ni. He hla hi TBCa leh Maggie te an duet vawi hnihna a ni a, kum 2009 khan 'Upto the Mountain' hla an lo sa dun tawh a ni.

Maggie chuan, "TBCa hi zaipui a nuam ka ti a, a thiam a, a bulah chuan kan zaithiam ve vek zel," a ti. Maggie hian a aw bawm lamah harsatna a tawk mek a, zai tur angin an sawi nain, la enkawl dam leh theih a nih avangin zai loa enkawl mek a ni. "Zai chuan eng emaw awm palh thei zawk a ni a, uluk taka enkawla la dam thei a nih avangin kan enkawl leh ta zawk a ni," a ti. Mahse tun hma ang kha chuan nasa takin a zai thei lo mai thei.

Ṭhazual Awards-a Rin Rin Best Male Artist (Gospel) dawngtu TBCa pawhin Maggie hi a chhuang hle. "Hmeichhia ka duet-pui hmasak ber a ni a, kan inkawmngeih hrim hrim bawk nen, ani hi chu zaipui a nuam, A aw a chak a, a zaithiam bawk a, a bula zai hi chuan eng hla mai pawh hi aw hian a zo lah vekin ka hre ṭhin," a ti. TBCa hian tunlai hian ama hla phuah a buaipui mek. A hla hi 'Ngaihdam ngai ka ni' tih a ni a, recording chu a zo tawh a, video shooting lam erawh a hmachhawp lian berte zinga mi a ni.