Mizo Idol tunkar aṭangin

Mizo Idol, 2015 Elimination Round chu tunkar Nilaini chawhma dar 11:00-ah ṭan a ni dawn ta.

Mizo Idol-a tel tur hian form la chhuak 900 chuang an ni a, heng zinga mi 644 ten an thehlut a, thehlut zingah hian AIR artist leh tunhnaia Cable TV-a zai intihsiaka top 10-a tling, Elimination paltlang ngai lo 13 an awm a, Mizo Idol Contest, 2013-a top 50 tling chin Third Round intihsiak aṭanga tel tur 8 an awm bawk. Eliminitation Round-a intihsiak tur hi an vaiin mi 623 an ni.

Zai hun tur hi vawiin chawhma dar 10:00-ah ZONET Office-ah leh Office luh chhohna kawng ânah tarchhuah a ni ang. Elimination Round-ah hian a hângin hla chang khat leh a thunawn emaw thunawn nei lo chu chang 2 hmangin intihsiak a ni ang a, Elimination Round hi June ni 12, 2015 (Zirtawpni)-ah zawh fel tum a ni.