Avengers: Age of Ultron ropuina ramah
Walt Disney tihchhuah, Avengers: Age of Ultron chu superhero movie-ho zingah pawh hmun chungnung a luah chho mek a, tunah hian hetiang movie zinga sum lalut hnem ber dawttu a tling dêr tawh.
Kar tawp chhung khan Avengers thar ber hian dollar mtd 400 zet a lalut leh a, hengte nen hian khawvel puma a sum hmuh chhuah tawh zawng zawng chu dollar tluklehdingawn 1.263 lai a ni tawh a, a la tluk loh chu a chhuak hmasa, Avengers kha a ni.
US tiam loin, ram hrang hrang aṭanga movie sum lalut hnem hrim hrim zingah pawh Age of Ultron hi a lang tawh a, pasarihna a hauh. US-a a lakluh tel lo hian dollar mtd860 zet a hlawh chhuak tawh a ni.
He movie hian China-ah ni 12 chhungin dollar mtd 210 zet a hlawh chhuak thei a, China-a movie tihchhuah tawh zinga sum lalut hnem ber palina a ni pha tawh a ni. South Korea aṭangin dollar mtd 80.8, UK aṭangin dollar mtd 68.4, Mexico aṭangin dollar mtd 48.3, Brazil aṭangin dollar mtd 44.5, Russia aṭangin dollar mtd 33.2 leh France aṭangin dollar mtd 32.1 a hmu chhuak tawh.