Zanin dar 8-ah Zonet-in puang dawn ‘Hnehna Ropui’

Kum 1996 khan Chanmari Branch KṬP buatsaih 'Hnehna Ropui' chu tihchhuah a ni a, Mizoram pum a fan chhuak hneh hle. Kum 14 hnuah Chanmari Branch KṬP-in  an thar thawh leh a, Zonet nena ṭangkawpin tunlai mil thei ang bera siam thar a ni.

Zanin dar 8:00 hian Vanneih­tluanga musical drama ziah 'Hnehna Ropui' chu Zonet Zawlbukah tihchhuah a ni dawn a, dar 9:30-ah Zonet Bawhbel-ah tihchhuah a ni leh ang. Internet lamah tv.zonet.in -ah zan dar 8:00 aṭangin a en theih bawk dawn.

Central Kristian Ṭhalai Pawlin November 1996 khan Musical Drama intihsiakna Vanapa Hall-ah an buatsaih a, minute 20 chhunga khung len tur a ni. Hemi ṭum hian K. Laltluangkima drama “Pa Kan Zui Dawn” tih, Mission Veng KṬP chan chu pakhatna a ni.

Hemi ṭum hian Chanmari Branch KṬP-in Vanneihtluanga ziah 'Hnehna Ropui' an thawhchhuah pui a, lawmman an la pha lo. LPS lam mit a tlung a, TV-a chang turin an sawm a, a lar chhunzawm dan chu rual u zawk chuan an hre vek ang.

Hetihlaia a changtu ber C. Vanlalvuana chuan, "LPS aṭanga sawmna kan hmuh khan a hla thu kha kan la bel em em a. Zan khat lekah stage, sitting room leh pawnah kan chang zo vek. Khatihlai khan en tur dang kha a awm lo a, min hlut sak ta khawp mai," tiin Vanglaini a hrilh.

Naupang, ṭhalai leh puitling thlengin Hnehna Ropui zunah hian an uai ta vek a tih theih a, drama dang Hlimna Kim an ti chhuak leh bawk nen Chanmari Branch KṬP pawhin hriat an hlawh hle.

Mavuana chuan, "Kum 1997-1998 chho khan sum tuak nan kan hmang a, hmun hrang hrangah kan chang a, sawmtu pawh kan ngah hle. Pu Tluanga ziah tho Hlimna Kim kan chang tel bawk," tiin kum 20 liam ta khan drama chu sumtuakna ṭha tak a nih thu a sawi a, tunlai ṭhalai tam tak chuan heng hun laia 'Variety Show' kha chu an man thiam pha kher lo ang.

Hnehna Ropui hi hmuhnawm tura chan chhuah leh a ni a, hei tak hi en a châkawmna chhan chu a ni. Chu aia pawimawh chu zirtir a neih ṭhatna tak hi a ni a, chhungkaw kima en theih a nihna hi a hlut zualna a ni  ang.

Vanneihtluanga chuan, "Khatih hunlai aṭang tawh khan mi pakhat hi a sual em em a, zu a rui ṭhin a, gospel camping-ah kal a, a piangthar tih lam kha an uar hle. Thlemna chungchangah mimal kan thlur bik a, chhungkua kan hmaih ṭhin. Chhungkua an bang bik lo tih thai lan ka tum a, a pawimawhzia phochhuah ka tum.

"Sual kan sawi hian ruihhlo ngai a kawk ṭhin. Rui ngawt ni lo khan theology dik lote hi thlemna a ni thei a, duhamna te, thamna te, rualawhna (materialism) te kha sual a ni thei vek. Miin an chawimawina, miin an fakna hi thlemnaah a chang thei bawk.

"Setana kan hmuh dan hi ka naupan lai chuan, hmai bal deuh, thla nei, eng emaw deuh turah kan ngai -  kan thlirna hi thlak ka duh. Setana hi a smart a ni tih phochhuah ka tum a, chutih rualin director kutah thui tak a innghat bawk," tiin Hnehna Ropui thil tum ṭha tak chu a sawifiah.

Hnehna Ropui hi zirlaia zir tlak khawpa ṭha a ni a, Pathian thu lam a ni emaw literature emaw pawh ni se Vanneihtluanga kut hnu hi a ṭha em em a, fak mai loh chu tih theih a awm lo.

Kum 1996 daih tawh khan zai loin an rap tawh a, hei ringawt pawh hi a hlu hranpa hrim hrim. Vanneihtluanga kut hnu thu leh hla ṭha tak chu music lama mi thiam hmasa Mavuana'n a 'beat leh chord' te a lo cheimawi a. Maruata leh Mavuana ten 'Dáwn teh u' an han sa te, Rinkimi'n  'Aw Valmawi' a sa te, Mavuana leh Rintei'n 'Lalpa Remruat' an han sa kha chu an ulukin an thiam bawk a, tun thlengin a la hlu reng mai.

Vanneihtluanga chuan, "Ka ngaih pawimawh em em chu works of art leh creative art hi a thi lo tih hi a ni. Generation thar hian anmahni ngaihtuah danin an ti thar zel. Ka hnathawh heti taka an hlut pui hi ka lawm a, ka beisei phak bak a ni. Kan thil tihna apiangah theihtawp chhuah zel hi a lo hlu khawp mai," tiin a sawi.

Chanmari Branch KṬP-in Hnehna Ropui tichhuak turin hun rei tak ngaihtuahna an seng tawh a, nikum khan an branch Diamond Jubilee pualin an puitlin. 'Musical drama' stage-a chan tura tih kha musical film-ah an thlak a, minute 20 atana siam kha minute 44-ah pawt seiin hmuhnawm thei turin an chang.

Mizo mipuiin kan hriat hmasak Hnehna Ropui kha zan khat lekah zawh vek a ni a, tun ṭuma mi erawh nikum August thlaa ṭan chan kha December, 2019-ah zawh a ni chauh. Chanmari Branch KṬP member-te hmuh theih turin hall-ah tihchhuah a ni tawh a, tun ṭuma tihchhuah tur hi khawih danglam leh hret a ni tawh thung.

Tun ṭuma aw thawhtute hi Mizo­ram pum huapa lar pha Zo­ram­­chhani, DJ Lalvenhimi, Jerry Lalrinawma leh Isaac Lalhruai­tluanga te an ni.

A hmuhnawm theih nan director pahnih Hruaia leh Adama te bakah Didini Tochhawng, director of photograhy leh Moitea Adhikari, visual effect te an ṭangkai hle.

Chanmari Branch KṬP secretary C. Lallawmsanga chuan, "Film-ah hian harsatna leh thlemna hrang hrang karah Pathian ṭih tute chu hun harsatna karah  Pathianin min awmpui zia pholanna a ni a, a entir hi a ṭha hle. Pathian zarah kan puitlin thei a, Mizo mipuite pawhin an hlawkpui ngei ka beisei," tiin Vanglaini a hrilh.

Covid-19 vangin kan inkharkhip tlang a, chhungkuaa Hnehna Ropui en a rem hlei hlei dawn. Tlangval fel takin thlemna a tawn dan chu thiam takin an rawn chang dawn a, nula chhelo takin, "Car i duh em? A sen nge a var? Lei ro sum tin chhek arbawmin lènlai i chèn ang hmiang," a rawn ti leh dawn!

He tlangval hian nupui fanau a neih hnuah pawh thlemna a tawng chhunzawm zel. Setana'n, "I páu i páu, i páu peih e!" a tih laite chu tun hmaa tleirawlte hlauh a ni ṭhin. 

Sawi tur a tam, ziah tur a tam, ziah zel chuan a hmuhnawmna tur a dal palh ang. Zanin dar 8:00-ah chhungkuain TV hmaa ṭhut a, Zonet Zawlbuk thlir zawng chu mipui lam chan a ni.

Dawn te u    Jerry & Isaac

Aw Valmawi    DJ Lalvenhimi    

Lalpa Remruat    Zoramchhani & Isaac

Thlemna    Mangheta & Joe

Hnehna puanna hla

(Thlemna thlipuite lo hrángin)    Zoramchhani & Isaac

Nang chauh kan ngai a che    Zoramchhani & Isaac

Hnehna ropui    Chanmari Kohhran

     Zaipawl

- Sound mawhphurtu hi Mangheta a ni a, Lord's Audiocraft-ah audio engkim hi siam a ni.