Albatross-in Music Video thar an ti chhuak

Mizo band kan neih ṭhat leh 90s leh 2000s tir lama lar em em ṭhin, Albatross chuan hun rei tak an reh hnuah music video thar an rawn ti chhuak ve leh ta hlawl mai.

Albatross hi mipui hmaah hun rei tak band angin an inlan tawh lo a, mahse kumin October 26 zana Zonet Arkaiden zan - Albatross zan hmanah khan band angin an rawn inlan ve leh a ni. Band angin che chhuak khat tawh viau mah se an hlate tam tak hi tun thlenga sak hlawh tak tak an ni hlawm. Music Video thar an tih chhuah hi Krismas hla, Ram ropuia Angelte u (Angels we have heard on high) tih niin, an band YouTube channel-ah an dah a ni. Recording leh perform hi Kings and Prophets Studio-ah an tih a ni. Albatross an rawn lang leh hi mi tam tak tan chuan a lunglenthlak zawk hial ang. Rintea a la zaithiam em em a, midangte kut thlak pawh a mawiin an music pawh a class leh hle.