Khiangte Construction Ṭhazual Lengzem : Blue Corn an chungnung

Khiangte Construction Ṭhazual Lengzem chart tharah Mizo girl group hlawhtling, Blue Corn in kum 10 chuang an reh hnua music video an tih chhuah thar, 'Luah Loh Zun' chu a chungnung ber.

Boruak nei lian leh mi tam tak duh rawn, an zai ngaihthlak nuam tak Blue Corn member - Kimkimi, Tlingi leh Felicia te hian 'Luah Loh Zun' hmaa an video tih chhuah hnuhnung ber chu kum 2012 daih tawh a ni. A ṭhen pasal fanau nei leh, hmun hranga an awm darh bawk avangin group angin an ti khawm hlei thei tawh lo a, mahse kumin October thlaah inhmukhawm thei hlauhin, October 11 zanah 'Luah Loh Zun' hi an ti chhuak ta a ni. An MV thar hian ngaihven pawh a hlawhin a hit nghal hle a, kar thum chhungin 1 million view an nei tling nghal. A hla hi Kimkimi phuah niin, music hi Ephraim Malsawma siam a ni. Recording hi Kings and Prophets ah an ti a, video hi WoWv Production kutchhuak a ni.

Zaii Hauchhum 'Thawnthu hlui' chu chart-ah No 2 ah rawn chho bawk a, he hla hi 'Sernung' film OST a ni. Zaii phuah niin music leh record hi Tluanga Hnamte (Westend Studio) kut chhuak a ni, video hi Tlaizawng Visual Production siam a ni. A hla dang 'Sual Inthup' chu No 9-ah a lanpui bawk. Mendal 'I hai der em ni' pawhin hma sawnin No 3-ah a rawn lang. Latei Hringen 'Par ang' leh Smiley x Hex Da Marshall 'Min hrilh rawh' chu Top 5 ah an lang bawk.

Ṭhazual Lengzem Top 10-ah hian Mary Dawngi, Rosalind Khawlhring, Luv Band leh Saka te an lang bawk a ni.