C. Sanga lenmawii a mawi ber

Ṭhazual Awards-a 'Thlêmna duhawm' min ngaihthlaktir a, a vir tawk chauha min siam laiin, Best Male Artist (Lengzem) dawngtu C. Sanga chu Rainbow Ṭhazual chart-ah pakhatna a rawn hauh.

C. Sanga'n pakhatna a rawn hauhpuina hla hi 'Chhingkhual lenmawi' tih hla a ni a, lengzem chart tihchhuah hmasakah khan pahnihnaah a awm. A hmaa pakhatna Essy chu a rawn nekchhuak a, a lenmawii aia mawi tunah rih chuan Rainbow Ṭhazual Chart-ah a awm lo.

Pakhatna ni tur hian C. Sanga hian a nghak ve nual a, pahnihna dinhmunah ṭum hnih a ding. He hla hi Ṭhazual chart-ah hian March 9 aṭang khan kan hmu ṭan a, hetah hian panganaah a rawn lang. Panganaah hian ṭum hnih a awm a, pangana aṭang hian pathumnaah a rawn kai chho nghal. Pathumnaa ṭum hnih a awm hnuah pahnihna a kai chho a ni.

Essy chu pakhtna aṭangin palinaah a chhuk thla dawrh a, a hmaa pathumna Christy chu pahnihnaah a rawn chho thung. Famkimi Kawlni hla 'Ka ngai em che' tih hla chu parukna aṭangin pathumnaah a rawn zuang chho dawrh a, Thiamchantira chu panganaah bawk a awm leh.

Top 10-ah hian Thangromawia Thomte hla 'Hmangaihna aia rosum' a rawn lang thar a, MSU Shillong-ho 'Ram leh hnam tan' tih chu pariatnaah a rawn lang bawk. He music video-ah hian Idol neih hnuhnun bera top 20, Remruati, Champhai Vengthlang kha a tel. Maremi hla 'Van a duai chuang e' tih chu 10-naah a rawn lang thar bawk. Joseph Fanai leh Tetea te hla 'Nuimawite' tih chu top 10 aṭangin a tawlh liam a, Raymond Lalhriatpuia Chhangte pawh kan hmu ta lo a, Lawmi Khiangte pawh 'Mangṭha' kan tih rih a ngai ta bawk.

Rainbow Ṭhazual 10

1 C Sanga - Chhingkhual Lenmawi

2 Christy - Tleitiri

3 Famkimi Kawlni - Ka ngai em che

4 Essy - Hey

5 Thiamchantira - Lokir rawh

6 J. Lalremruati - Inhrilh dun ang

7 Feli Fanai - Ka liam e

8 MSU Shillong - Ram leh hnam tan

9 Thangromawia Thomte - Hmangaihna aia rosum

10 Maremi - Van a duai chuang e