Essy Zohnahthlak ngei a ni

'Inchhuang mai lo la' tih te, 'Hey' tih te a rawn hit-pui viau hnuah Essy chuan music video thar a nei leh ta. He music video hi 'Zohnahthlak ka thlang' tih a ni a, Mizo nih a nawm phah e.

Essy video thar 'Zohnahthlak' tih hi Mapuia, Lalremruata Dawrpuia mi phuah a ni a, a satuin a zir bawka zohnahthlak ngei nih pawh a a inchhuanthlak veng veng dawn a nih hmel. He video hi Zirtawpni khan zawh fel a ni tawh a, Cable TV-ah kan mu chho ṭan ang. A hmaa hla pahnihte a hit-pui a, a hlawhtlinpui hle a, tuna mi hi a hlawhtlinpui leh ang em? Amah en chuan a rinawm viau a ni.

'Zohnahthlak ka thlang' tih hla hi Lalremruata Project 2015 album-a awm tur a ni a, he album-ah hian tunlaia Mizo zaithiam lar tak takte an zai dawn a, he album-a mi tur hla pakhat, Lancy Remlalhruaii sak chu hman deuh lawk khan TV lamah pek a ni tawh bawk.

Mapuia hian hla a ngah ve viau tawh a, a hla phuahte hi album pathum laiah dah tawhin tuna an buaipui mek hi a palina tur a ni. Jampui tlangdung Mizo zaithiam rualten Mapuia hlate hi album-in an siam hmasa ber a, chumi hnuah Margareth Lalbiakzualin a saksak bawk a, Lalremruata, Mapuia Collection siam a ni leh bawk.

Project 2015-ah hian lenglawng leh fakna hlate dah a ni hlawm dawn a, album ṭha tak a ni ngei ang. Essy leh Lancy bakah hian Feli Thangluah, Pensy, Bethsy, Lalramchhana, VLA, Lallawmawma, Lalhlumawii, Sawmtea, Manuna of Hard Ray, Ramtiami teho an zai dawn a ni. Kumin chawhnu lamah tihchhuah tum a ni a, nimin khan he album-a video tur ṭhenkhat chu shot a ni. Kar leh khi chuan he album-a mi tur hla pathum vel siam zawh beisei a ni.