San Andreas a hlawhtling

The Rock-a channa film reng reng a hlawhtling chho malh malh mai a, wrestler aṭanga movie khawvela luh chilh zingah chuan mi hlawhtling ber a ni ngei ang. Tunah hian a movie thar, San Andreas chu box office-ah pakhatna a ni leh ta.

Dwayne 'The Rock' Johnson-a channa, San Andreas hian kartawp chhung khan dollar mtd 53.2 zet a lalut a, US pawna a lakluhte nen dollar mtd 113.2 zet a lalut hman a ni. The Rock-a mimala channa zingah San Andreas hi kar khat chhunga sum lalut hnem ber a ni. Furious 7-ah kha chuan a changtu tam tak an awm a, amah chauh a changtu ber a nihna film a ni San Andreas hi.

The Rock hi hmeichhe upa tawh lam deuh zingah a tla na a ni ngei ang, ticket leitu zinga a zatve vel zet hi hmeichhia a ni a, hmeichhiaah pawh kum 25 chunglam an tam ber. San Andreas hi lirnghing na tak mai, magnitude 9 zeta nain San Francisco a nuai a, The Rock hi ṭanpuitu pawl zinga mi niin, helicopter khalhtu a ni a, lirnghingin a nuai karah a fanu a zawng a ni.

Pahnihnaah Pitch Perfect 2 a la awm a, he film hian kar tawp chhung khan dollar mtd 14.8 zet a lalut. He film hi box office-ah hian a lang rei ta hle a, hapta thumnaah pahnihna a la hauh thei a, US-ah ringawt dollar mtd 147.5 zet a hmu chhuak ta. Tomorrowland chu pathumnaah a awm a, dollar mtd13.8 a lalut leh thei.

Box office movie

"San Andreas" - $mtd53.2

"Pitch Perfect 2" - $mtd14.8

"Tomorrowland" - $mtd13.8

"Mad Max: Fury Road" - $mtd13.6

"Avengers: Age of Ultron" - $mtd10.9

"Aloha" - $mtd10

"Poltergeist" - $mtd7.8

"Far from the Madding Crowd" - $mtd1.42

"Hot Pursuit" - $mtd1.3

"Home (2015)" - $mtd1.1