Lersia Play November Chart: 'Pu Nunga Colony' in record siam

Mizo film streaming app, Lersia Play-in November, 2024 chhunga film a hralh chhuah hnem ber chu In-House Production film, 'Pu Nunga Colony' bawk a ni. He film hi October thla chhunga hralh chhuah hnem ber a lo ni tawh bawk.

In-House Production film pasarihna, 'Pu Nunga Colony' hi October 4-a tlangzarh kha niin, director hi Drew Pachuau niin, scriptwriter Samuel Pachuau a ni. In-House movie siam tawh zingah a hautak ber niin, budget hi Rs nuai 15 a tling a ni. He film-ah hian Mizo lemchan thiam kan neih ṭhat tak takte an inlan. Papuia Pachuau, Sangsangi, Rosangpuii (Rspi), Tommy leh Francis Malsawma te an chang a, Fela Ralte (Rala Kone) pawh a inlan bawk a ni.

'Pu Nunga Colony' hian Lersia Play-a film chhuak zingah hralh ṭha ber record a siam thar bawk. Film hralhna aṭang hian Rs nuai 64.3 zet lak luh a ni tawh. Hemi hmaa record siamtu chu In House Production kut chhuak tho, 'Pa Hausa (ka aim in life)' niin Rs nuai 61.3 zet a lo la lut tawh bawk.

November thlaa film hralh chhuah tam pahnihna chu November 26-a chhuak, 'Thih leh Dam II' a ni. Thla tawp lama tih chhuah ni mah se No 2 a rawn ni pha nghal a ni. Director Lalbiakvela hian a film hmasa, 'Thih leh Dam' hmangin Mizo Film Award 2024-ah khan Best Director Award a dawng nghe nghe.

Leitlang Pictures kut chhuak, 'Blackmail' chu pathumna niin, The Friday Show film siam hmasa ber 'Call Girl' leh KVS channel film pahnihna, 'Dawt Sawi Suh' te chu Top 5-ah an lang.

Mizo film industry a ṭhang chak hle a, kumin January aṭanga November thla chhunga Mizo film chhuak thar hi 41 an tling a ni. Lersia Play hian film chhuak tharte hi mahni in lum ngeia en theih turin an app kaltlangin an rawn chhawp chhuak ta bawk nen, film pawh a chhuah hnem phah niin a ngaih theih a ni.