New York Khawpui dang zawng aiin power an hmang hnem

'Zan mu chhing ngai lo khawpui' New York khu khawvela khawpui lian dangte nena khaikhinin power an hmang hnem lawt lak a, chu mai bakah bawlhhlawh pawh an ngah ber.

Enel Group ten New York leh khawpui lian dangte an zirchianna aṭangin New York hian resource an ei hnem bik hle a, bawlhhlawh pawh an ngah ber a ni. New York khawpui leh a chhevela cheng zawng zawng hi mi maktaduai 22 vel zet an ni. Hetianga khawpui lian hi kum 1970 chho kha chuan khawvelah pariatah chiah a awm a, tunah chuan 27 lai a awm tawh a, China leh India-ah hetiang khawpui lian hi a pung nasa hle.

New York hi sumdawnna hmunpui a ni a, he khawpui aṭang hian hausakna tam tak chhuak mah se, bawlhhlawh pawh a chhuak hnem hle. Khawvel puma mihring cheng zat aṭanga chhutin zaa 6.7 chauh New York hian a kawl a, chutihlai chuan bawlhhlawh lian (solid waste) hi khawvelin a pek chhuah zaa 12.6 a pe chhuak a, khawvelin petrol a hman zawng zawng zaa 9.9 zet a hmang a, electric pawh zaa 9.3 lai a hmang.

Khawpui vawn fel leh fel loh tehna pakhat chu tui an tiput hnem em tih hi a ni. Hetiang kawngah hian New York leh Tokyo a intluk hle. Heng khawpuia tui supply zawng zawng zaa 3 chu pipe aṭanga put chhuak a ni a, khawpui dang tam takah chuan zaa 20 lai a tling. Brazil khawpui lian pahnih - Sao Paulo leh Rio de Janeiro-ah te phei chuan tui supply zawng zawng zatve zet hi a tum hmun a thlen hmain pipe ṭha lo avangin a put ral a ni. Heng khawpui pahnihah te hian tui indaih lo an sawi ve reng.

Khawpui ṭhenkhat chu an entawn tlak hle. London hian kum 2001 aṭang khan an khawpuiin energy a ei ral tih tlem tumin hma an la a, kum 2010 kha chuan electric tha an ei ral nasa takin a tlahniam tawh a ni. South Korea khawpui Seoul hi khawvela khawpui liante zinga tui hman hnu hmang leh nasa berte zinga mi a ni. Moscow hian electric tha nasa taka hmang mang loin an khawpui tihlumna, heating system an nei ṭha hle.