Khawpui chên châkawm loh

Firfiaka chêtnain a bawhbuai em em ni chuang lo khawpui, chênna atana duhawm lo tak tak hi a lo tam hle a, a bikin Latin America huam chhungah a tam. Khawpui ralmuang lo tih hian tualthahna leh pawikhawihna hrang hrang thlen tamna khawpui a ni. Hetianga teha khawpui ralmuang lo ber ber 10-te hi Latin America-a mi deuh vek an ni a, US-a khawpui hmingthang Detroit pawh a lang tel.

Honduras-a khawpui, San Pedro Sula hi khawvela khawpui ralmuang lo leh chênna atana hmun duhawm lo ber a ni. Kum 2011-a tualthahna thlen tam dan tarlanah chuan mi nuai 1 zel awmnaah tualthi mi 159 awm zel ang an ni. Honduras hrim hrim hi khawvela tualthahna thlen tamna ber ram a ni. Tualthahna thlen tam dan hi hetiang hian sawi ila a chiang; he khawpuiah hian ni tin tualthi pathum an awm ziah tihna a ni. Misual pawl hrang hrang an tam hle.

Pahnihna chu Mexico-a khawpui lar pawl Acapulco hi a ni. He khua hi zan lama an boruak a ṭhat em avangin a hmingthang hle a, miin an pan khawm chhan a ni ṭhin. Ruihhloa sumdawng pawl hrang hrang avangin nun a khirh hle a, police-a an rinawm loh a, an corrupt em em. Ruang chhar thu hi chu thil pangngai a ni. He khuaa i kal a, i awm lohna tur hmunah a hun loa i awm vaih chuan dam beisei loh a ṭha ber!

Venezuela-a Caracas pawh hi tlawh fo lo ila kan him a ni mai! He khua hi khawvela mihring tam dan aṭanga teha tualthihna thlen tamna berte zinga mi a ni. Tualthahna leh tharum thawhna a thleng zing em em a, chungte chu chhui zui lem loha hlamchhiah tak mai mai a tam. Chumi awmzia chu pawikhawihtute hrem lohin an chhuak nasa tihna a ni. Arte thiha thih mai awlsamna hmun a ni.

Honduras-a khawpui tho, Tegusigalpa hi khawpui ralṭi berte zinga mi a ni leh bawk. Metropolitan Cathedral, biak in ropui takte awm mah se, a chhunga chêngte erawh an ṭha vek bik lo. Honduras hrim hrim hi tualthahna thlen tamna ber ram a nih kha. Mi nuai khat zel awmnaah tualthahna kum khat chhungin, he khua bikah hian vawi 83.2 awm ang a ni a, Honduras pumpui ngaihtuah chuan an dinhmun a ṭha hret. Mahse motor-a chetsualna a tam em em lehzel hi a buaithlak. Record hmuh theih hnuhnung berah khan motor-a chetsualna, he khuaah hian 246 a awm a, chunga a tuartu berte chu kawngsira kea lo kalte leh thirsakawr khalhtute an ni leh daih!

Brazil-a an khawpui lian pakhat, Maceio hi a ralṭi phian bawk; panganaah a lang pha. Tualthahna bawk hi an buapui a ni. Mi nuai khatah tualthahna 135 awm ṭhin ang a ni a, Brazil-ah chuan Rio de Janeiro dawta tualthahna thlen tamna ber a ni. Hei bakah a khaw boruak hi a nuam em em hran lo.

Cuba khawpui Havana chu paruknaah a awm a, US-a khawpui hmingthang leh hlawhtling ṭhin Detroit chu pasarihna niin, Aigupta khawpui Cairo chu pariatnaah a lang bawk. Ukraine khawpui Kiev leh Mexico-a mi Nuevo Laredo te chu pakuana leh sawmna an ni.