Cancer Hospital tan PUMP che chhuak dawn

People United in Music With a Purpose (PUMP) chuan zanin hian Cancer Hospital pualin charity concert a buatsaih leh dawn. Zonet leh LPS-ah live-a pek chhuah a ni ang.

Charity concert hi Ignite Studio-ah neih a ni dawn a, zan dar 8-ah ṭanin Mizorama zaithiam kan neih ṭhat leh boruak nei lian tak takte an inlan dawn a ni. He hun hman chhung hian cancer dam lo harsa zawkte vehbur khawn sakin, ṭanpuina pek theihna tur siam a ni ang. Zanina hun an hman bakah, PUMP hian cancer damlo pual hian Millenium Centre leh Aizawl khaw chhung hmun hrang hrangah bawm an hung bawk.

PUMP hi a hma pawhin mi dangte ṭanpuina kawngah an lo che chhuak fo tawh ṭhin. Cancer Hospital Zemabawk Poor Fund tan hian kum 2019, December thla khan vehbur an lo khawn tawh bawk a, hemi ṭum pawh hian zaithiam hrang hrangte inlanin, zai man cheng khat pawh la loin damlo te tan an che chhuak a ni. MADS leh Art Novelty Gallery chuan poor fund atana sum an khawnnaah hian a duh duh tan face painting, portrait painting te an lo tihsak bawk a ni. Kum 2020, January 24 khan he programme aṭanga an sum hmuh chhuah zawng zawng, Rs 4,58,502.00 chu a bo a bang awm loin Cancer Hospital (MSCI) Zemabawk Director Dr Zoramthanga hnenah an hlan a ni.