Game of Thrones star Dame Diana Rigg a thi
Kum 10 liam ta chhunga series lar ber pawl Game of Thrones-a changtu pawimawh tak Olenna Tyrell lema chang Dame Diana Rigg chu Ningani khan kum 82 mi niin cancer vangin a thi.
A fanu, lemchan thiam tho Rachael Stirling chuan a nu chu cancer vangin a thi tih a sawi a, March thla aṭang khan cancer vang hian enkawl a ni tawh tih a sawi bawk.
Rachael Stirling chuan a nu chuan a hun tawp lam chu hlim takin a hmang tih a sawi a ni.
Dame Diana Rigg hi English a ni a, July 20, 1938 khan Yorkshire, England-ah piangin lemchan lamah sulhnu a hnutchhiat ṭha hle a, James Bond film awm tawh zawng zawnga 007 nupui lema chang awmchhuna ni bawk.
Kum 1969-a tihchhuah On Her Majesty's Secret Service-ah khan James Bond nen an innei a ni. GOT fan-te chuan Olenna Tyrell role a hnehsawh zia an hre vekin a rinawm a, GOT hma hian khawvel huap film lar tam takah a chang tawh tih erawh mi tam tak chuan an hre kher lo mai thei.
TV series hrang hrang 50 velah a inlan hman a, chung zingah chuan The Avengers (1965–1968) pawh kha a tel a, movie 10 chuangah a inlan bawk.
A lemchan thiam avangin chawimawina pawh a dawng nual a, Emmy Awards nomination phei chu a dam chhung khan a hmu hnem hman hle.
Mi lar tam takin social media kaltlangin Dame Diana Rigg an ui thu hi an tarlang nghal a, James Bond leh Game of Thrones official twitter account pawhin Diana Rigg an ui thu hi an tarlang ngha a ni.