Hrileng karah Guitar hralh a kal Kumdang zawng aiin Fender-in guitar an hralh hnem

Gibson, Taylor, Martin leh guitar company dangte pawh guitar an hralh nasa hle tih an sawi.

Kum thum liam ta maiah khan Washington Post chuan electric guitar chu muangchangin a thi mek a ni, tiin an ziak a, hei hi Paul McCartney leh guitar dealer hmingthang George Gruhn-te ngaihdan pawh a ni. Mahse New York Times chuan tunhnaia an article tihchhuahah guitar chu a la dam ṭha hle a, a dinhmun pawh a ṭha leh tawh tih tarlangin; kum tam tak chhunga a vul lai ber a thleng niin an rawn ziak ve thung.

Ni e, kum 20 liam ta chhung vel thlir let kha chuan Washington Post article ziah hi thil awihawm tak a ni. Electronic Dance Music-in khawvel a run chinah phei chuan guitarist lam aiin disc jokey lam an tla na ṭan niin a lang. Mahse kumin hian nasa takin guitar an hralh chhuak leh niin guitar siamtu company-te chuan an sawi a, guitar tam tak leitu chu hmeichhia an nih thute pawh an tarlang tel zel. 

Fender Musical Instru­ments Corporation (FMIC) chief executive Andy Mooney chuan kumin hi Fender history-a guitar hralh tam ber kum a ni dawn tih sawiin, kumin hi an tan chuan record sales year a nih thu a sawi.

"March thla kha chuan min zawt pawh ni ula tuna kan dinhmun ang hi a thlen ka ring ngai lo ang," tia sawiin an rin phak bak thil a thleng a ni.

Guitar instrument a thi mek nia miin an ngaih lai takin hri a leng leh ta bawk nen, industry tam tak angin guitar industry pawh an inkhar a ngai a, guitar chu miin an ensan mai ang tih a hlauhawm zual. Mahse rin loh lamin thil a thleng ta a, Times-in a report dan chuan naupang leh tleirawl/rawlthar tam tak chuan guitar an lei nasa hle a, chung zinga tam tak phei chu hmeichhia an ni. An nu leh pate'n an lo tuipui tawh ṭhin instrument chu an rawn hum ve leh ta sap sap mai niin a lang.

Lockdown chhunga a thlawna guitar zirtirna Fender Play kaltlanga an buatsaihah chuan March aṭanga June inkarah khan 150,000 aṭangin 930,000 vel zetah an pung a, chung zinga 20% chu kum 24 hnuai lam niin 75% chu kum 45 an ni.

Hripui len hma khan Fender play kaltlanga guitar zirah hmeichhia 30% an awm a, hri len hnuah erawh 45% an ni thung.

 Gibson CEO James “JC” Curleigh chuan April thla kha chuan guitar an siam chhuah loh thu leh hralh chhuah pawh an nei lo tih a sawi a, mahse nipui tawp lam a lo thlen meuh chuan an guitar lei duhte chu an pe seng lo zawk tih leh an siam apiang an hralh zo nghal zel tih a sawi ta thung.

Martin CEO Chris Martin chuan an hun tawn mek chu 'guitar boom' tiin a sawi hial a, Taylor co-founder Kurt Listug pawhin June thla khan guitar an hralh hnem hle tih a sawi ve bawk.