Album hlawhtling 1989 album
Ṭhenkhat chuan an ngaina fa lua lo mai thei a, mahse Taylor Swift album 1989 hi chu khawvel pumah a hlawhtling tih satliah hian a hlawhtlinzia a tarlang phak lo hial zawk awm e. A thlen chin ramah chuan top chart a hauh nghal thuai thuai zel a, nikuma a tihchhuah daih tawh a, tun thlengin US Billboard Chart-ah chuan pahnihna a la hauh thei a ni.
1989 album hi Taylor Swift chuan official taka pop album a tihchhuah hmasak ber tiin a sawi a, October 27, 2014 khan a tichhuak a ni. He album hi Swift hian Red album a tihchhuah kum aṭang khan a buaipui nghal char char a ni. October chawlhkar tawp berah a tichhuak a, kar khat chhungin copy 1,287,000 zet a hralh a, kum 2002 hnua kar khat chhunga album hralh hnem ber a ni. Kum 2014 chhung chauh khan US-ah he album hi copy maktaduai 4.6 zet an hralh hman.
He album aṭang hian single-in Shake It Off, Blank Space leh Bad Blood te a tichhuak tawh a, US Billboard Hot 100 (single chart)-ah pakhatna an hauh vek a, tunah a single palina, Style chu top 10-ah a lang leh mek bawk.
Album a tihchhuah hma khan critics leh sale executives te chuan kar khat chhungin copy nuai 7 a hralh hman an ring a, mahse a chhuah dawn hnaih tak taka mipui beisei dan an thlirin maktaduai 1.4 a hralh tlin an rin thu an puang leh a ni. Copy mtd 1.287 a hralh a, hei bakah hian Microsoft promotion ang rengin, dollar 0.99-in tam fe hralh a ni bawk. Nielsen SoundScan chuan Billboard album chart, official Billboard Hot 200-a lang tur an tehkhawngah, album an tihchhuah aṭanga hapta li chhunga dollar 3.99 aia tlawm loa hralh chin chauh an chhiar avangin dollar 0.99-a an hralh ho hi chart-ah an chhiar tel ngai lo.
Chart hrang hrangah dinhmun sang a hauh nasa a, Australia, Canada, Belgium, China, Netherlands, Ireland, New Zealand, Norway, Scotland leh UK-ah te pakhatna a hauh a ni.
Australia-ah ringawt 350,000 zet hralh a ni tawh a, Canada-ah 314,000 an hralh a, Japan-ah 250,000, UK-ah 600,000 leh US-ah 4,830,000 hralh a ni tawh a, khawvel puma an hralh tawh zawng zawng zat hi copy 8,600,000 zet a tling tawh.
Taylor Swift hi December 13, 1989 khan Wyomissing, Pennsylvania-ah a piang a, a hming pum hi Taylor Alison Swift a ni. Sakhuana lama a rilru puthmang a sawi chhuak lem lo a, Catholic chhungkua erawh an ni. A nau mipa hi Catholic research university lian leh hlun, University of Notre Dame-ah a kal. Kristian band, NEEDTOBREATHE te nen an tour-ho fo bawk. Politics-a a ngaihdan pawh a sawi chhuak ngai vak lo a, ṭum khat lai khan MySpace-a a page-ah 'Republicans do it better' tih a ziak a, chuvang chuan Republican Party hi a ṭan nia ngaih a ni.