ZONET ṬHAZUAL AWARD 2020 Zaninah an sem dawn ta

Mizo zaithiamte tana award ngaihhlut Zonet Ṭhazual award chu zanin hian sem a ni dawn ta. Hripui len avangin ruahmanna hmasa ṭhulh a ngai a, November thlaa sem hman tura ruahman chu zanin hian sem a ni dawn ta a ni.

Sorkar dan siam sa zawm chungin zanin dar 8-ah hian Vanapa Hall-ah award semna ceremony hi buatsaih a ni dawn a, programme buatsaihtu lam chuan ruahmanna fel tak siamin a hmuna chhim thei chin pawh SOP zawmin mi 35-ah an rek bung a, in lamah TV aṭangin emaw internet kaltlangin emaw thlir mai a ngai dawn.

Zaninah hian Pathian Fakna huang award sem a ni dawn a, naktuk zanah Lengzem/Lenglawng artist-te hnenah sem a ni thung ang. Programme hi Zonet Zawlbuk leh YouTube-ah live a ni dawn.

Zanin bikah hi chuan Pathian Fakna hla sa ṭhin MDM artist-te hnenah award hi sem a ni dawn. Tarlan tawh ṭhin angin tunhnai lawka 'Pu' ni thar Mizo Idol star Hmingtea Chhangte chu a pum puiah nomination hmu tam ber a ni a, pathum a hmu.

Best Male Artist nominee zingah a hming a lan bakah Best Music Video Gospel-ah 'Hun Duhawm' chu award lakpui mai thei a ni bawk a, Helly Zathang nena an zaidun avangin Best Group/Category-ah nominee a ni bawk.

Zualteii Khawlhring chuan nomination pahnih hmu bawkin Best New Artist leh Best Music Video-ah a hming a lang a ni. Maruati, Fiona leh Bethsy-te chuan nomination pahnih hmu chiah lo mah se an hla sak phuahtute chuan Best Songwriter category-ah nomi­nation an hmu thung.

Kristian ram kan ni bawk a, Gospel singer pawh Mizoram hian kan nei ṭha hle. Kumin Ṭhazual Award semna turah pawh hian mimal zaithiam kan neih ṭhat avangin award la tur mai pawh rinthiam an harsa hle.

Best Female Artist Gospel Category-ah hian naupan lai aṭanga zai thiam vanga lar tawh Bethsy Lalrinsangi, zai tura sawm hlawh ber pawl Cindy, a tleirawl chhuah tirh aṭanga huhang nei lian tawh Fiona, Mizo Idol hial ni thei Grace-i leh zai nung ṭhin tak, tunlai Gospel singer zinga huhang ngah ber pawl Maruati-te an awm a, tupawh hian he award hi la se a awm em em vek ang.

Best Male Artist Gospel Category-ah pawh 'Ka Nghing lo ang' thiam taka satu Amtea, hun eng emaw chen Mizo zaithiam mipa hriat hlawh ber pawl ni tawh Dr Zoa, nomination hmu tam thei ber Hmingtea Chhangte, zai thiam vanga chawimawina dawng hnem tawh tak Sawmtea leh Praise On star 'Min Hual Reng Ṭhin' hitmaker Zorina-te an awm bawk. Award dawng tur hriatthiam a har.

Zaninah hian Amtea, Grace-i, One in Christ ft. Isaac, Stacy Punte, Ruthi Zonunsangi leh Swordtune-te an zai dawn. One in Christ ft. Isaac hian OiC member, May thlaa boral ta Lalruatdiki Chhangte pualin an hla sak tur hi an hlan.