US-a Kristian ta company lian

US-a Kristiante chakna chhan pakhat chu mi hausa, inpe tak tak, Kristian ṭha tak tak an tam vang pakhat khu a ni. US-a company lian leh lar tak tak ṭhenkhat khu Kristian ṭha tak takte ta a ni hlawm a, hei hian Kristianna darhzauna kawngah pawh a thawhhlawk hle.

Thuamhnaw, jeans leh a behbawm siamtu lian, Chick-fil-A khu Kristian ta a ni a, sumdawng ni mah se Chawlhniah an dawrte an la khar ṭhap ṭhap ṭhin. Hei mai bakah hian anpui inneih hi Bible zirtirna nen a inmil loh avanga a dotu lian berte zinga mi a ni.

Mary Kay hi Mizoram thlenga kan hmelhriat leh kan hman lar a ni; company hming a nih mai bak a din chhuaktu hming a ni bawk. A dintu ber Mary Kay hian kum 1997 daih tawh khan Kristian piangthar a nihzia a tarlangin a sawi chhuak tawh a, a sawi chhuak châmchi a ni. Mary Kay hlawhtlinna chungchanga a sawi chu, "Kan thil tumte a dika a ṭhat avangin Pathianin mal min sawm. A kutchhuak hmeichhiate hi mawi lehzual se tih min duhpui a ni," a ti ṭhin.

Burger lama US-a hriat hlawh, In-N-Out Burger hian an paper bag-ah te Bible châng an la chhu lang zat zat a, en thuak chuan hmuh mai a harsa a, an thil funnate uluk taka en chîk chuan Bible châng hi a hmuh theih.

US-a domestic flight company lian pawl Alaska Airlines neitute hi Kristian ṭha tak an ni bawk. An thlawhtheihnaa chuangte uluk taka enkawl hi Chanchin Ṭha an puandarh ber pakhat a ni a, thlawhtheihnaa chuangte chaw an pekna tray-ah ṭawngṭaina thu ziak an dah tel ziah ṭhin.

Marriott International te, Jack in the Box te, Interstate Batteries te, Tyson Foods te hi Kristian ṭha tak enkawlna hnuaia mi an ni.