Fashion Fiesta

Tunlai khawvel changkang chho zelah kan incheina pawh a dangdaiin a danglam chho zel a, kan nitin nunphunga kan thil tawn leh min hualveltuten nasa takin kan incheina pawh a thunun nasa hle a ni. A tel lova kan awm theih loh, a inbel chi ni miah si loah chuan kan Mobile Phone hi kan incheina langsar ber pakhat a ni chho ta a ni. Ṭhangtharte zingah Mobile Phone kawl lo pawh kan awm tawh mang awm lo e. Chumiina a ken tel pakhat, tunlai ṭhalai ten kan uar em em, a tel lo chuan kan nunphung a buai ta vek emaw tih tur khawpa kan hman nasat, a ṭha lo lam zawnga hmang duh tan chuan chhiat vek theihna, a hmang ṭang­kai duh tan chuan ṭangkai fu si WhatsApp hi kan hmelhriat vek awm e. Thangthar mai ni lo nu leh pate chenin inkawm hlim nan kan hmang ṭangkai ta hle a ni. WhatsApp khawih dawna pawimawh em em mai, kan uar bawk si, thu tam tak sawi ngai loa kan sawi duh tak tichiang em em si “Emoji” ṭangkaizia leh kan uarzia chu kan hre vek awm e. Facebook, WhatsApp leh SMS ah te kan hmang awl lo. A hman dan pawh inzirtir hranpa pawh ngai lovin a tu a te pawh hian kan hmang thiam em em vek mai chu a nih hi. Emoji kan tih chuan Zawngte mit hup/beng hup/hmui hup, Smiley lei chhuah, ṭhen thaw, mittui tla leh hmeichhe lâm te ho kan sawina hi a ni ber a, Technology mai ni lo incheina khawvelah pawh tun kum hnih kalta vel aṭang khan kan seng lut chho ta a ni.

Kum 1982, September thla chuan Scott Fahlman, Computer Scientist chuan Carnegie Mellon University Message Board te hnenah lehkha thawnin hlim hmel leh lungngai hmel chu thutak leh thutak lo thliar hran nan hman nise tiin a rawn a. Hei hi hriat theih hmasak bera emoticons an hmanna niin hemi hnu fe, 1990-ah chuan Japan rama inbiak pawhna Firm pakhat NTT Docomo chuan hlim hmel leh lungngai hmel etc. Smiley kan tih ho chauh chu changtlung tawk lova ngaiin Emoji hi an lo siamchhuak ta a ni. Hemi hnu lamah hi chuan engtiang chiahin nge Emoticons leh Emoji hian kan nitin nunphung a sawi danglam nasatzia chu kan hre vek awm e. Thawmhnaw lam thlengin nasa takin a rawn thunun chho ta reng a ni. Thawmhnaw siamchhuaktu Company lian tak tak ten ṭhalai ten an ngainatzia hriain thawmhnaw leh pheikhawk, eng ilo incheina, Bag leh Phone Cover te thlengin Emoji lem hmang hian an siamchhuak ta chur chur mai a ni.

Fashion lama mite ngaihsan leh sulsutu Karl Lagerfeld pawhin a Perfume siamchhuah thar tihlarna ni pah fawm­in EmotiKarl App a siamchhuak a, hetah hian Emoji hrang hrang Perfume Bottle lemtea a Zawhte hmingthang Choupette hmel lem te, a Trade mark Leather kutkawr te leh a hmel lem te Smiley aiah hman theih turin a siamchhuak nghe nghe. Heng EmotiKarl hi tlema fashion lama kei ka ni inti deuh tan chuan hman ve ngei awm tak a ni. I lo hman chak hlauh takin Itunes leh Google play-ah te download theihin a chhawp chhuak nghe nghe. Hei hian nasa takin incheina khawvelah Emoji a larzia a tilang chiang hle a ni. Heng bakah hian Beta Brand leh Fashion House ṭhenkhat ten kawr mai ni lo, ṭhi, bengbeh leh zungbunah te an siamchhuak a, a lem chuang ringawt lo deuh te pawhin puanthana chhut ang chi te pawhin an siamchhuak chho ta zel a, hmeichhe lam chauh ni lo mipa Kamis thleng pawhin hmuh tur a awm tawh a ni.

Kumin International Fashion Week Spring/Summer Collection-ah chuan Design House lian tak mai Moschino chuan Smiley Flag hmangin thawmhnaw dangdai tak tak an rawn siamchhuak a, mipa Kamis-ah te khawvel ram hrang hrang Flag Smiley lem hmanga an duanchhuah hmuh tur an rawn phochhuak nual a, tun thlaa Milan, Italy-a neih tur Universal Exposition-ah pawh heng Smiley Flag an tih ang hi Official takin an zar dawn nghe nghe a ni. Heng Smiley Flag hi mite hlut a hlawh chho hle a, a chhan ni awma lang chu hnam hrang hrang karah remna leh muanna, hlimna te a lo awm deuh deuh theih nana duan chhuah a ni a. Hei vang te pawh hi a niang khawvela foot­ball inelna sang ber pawl leh ngaihhlut berte zinga mi Euro 2016 Lon­don-a neih turah leh Rio Olympic lo thleng turah hian heng Smiley Flag-te hi Official taka hman tum mek an ni. Heng aṭang te hian khawvelin Emoticons leh Emoji kan ngaihhlutzia a tilang chiang hle a. Chuvangin tunlai i duh chuan heng thilte hi i incheinaah khan itihlan ve fo a pawimawh hle ang.

Tluangpui Hmar
Instructress, VIFT