Hmanah chuan The Beatles an awm a Tunah chuan Bangtan Boys?

Khawvela band ropui ber hming eng nge? tiin zawhna inzawt ta ila, mi tam tak chuan The Beatles tiin kan chhangin a rinawm. The Fab Four-te khan an album panga a zawnin Billboard 200 chart-ah No.1-an nihpui a, July 30, 1966 leh December 28, 1968 inkara an album tlangzarh pangate hmang khan band anga Billboard 200 chart topping album a zawna panga nei thei awmchhun an ni. Chu record chelhtu dinhmunah chuan kum 52 lai an ding.

Kum zabi 21-na a inher chhuak a, khawvelin a tuipui rimawi pawh 60's hunlai nena khaikhin chuan a danglam tawh hle. Tunah chuan K-Pop lamin rimawi khawvel an thunun tih loh rual a ni ta lo. The Beatles-in record ropui an lo siam tawh chu K-Ppop superstar rual Jin, Suga, J-Hope, RM, Jimin, V leh Jungkook-te chuan an rawn nihrual ta tlat mai. Kum 52 a ral hnuah band anga a zawna album hrang panga Billboard 200 chart-a No.1 dinhmuna vawrh thei an rawn ni ve leh chiah.

The Beatles khan kum khat leh thla nga chhungin No.1 album panga an nei hman a, hemi record erawh hi chu an la rawn khum thei lo thung a, BTS hian kum hnih leh thla ruk chhungin he record hi an rawn siam thung a ni.

BTS hian ‘Love Yourself: Tear’, ‘Love Yourself: Answer’, ‘Map of the Soul: Persona’, ‘Map of the Soul: 7’leh 'BE'-te chu Billboard 200 chart-ah hian No.1 an nihpui vek a ni.

BTS hian an album thar leh an album pakuana (Korean ṭawng album bikah chuan pangana) November 20-a an tlangzarh BE hmangin Billboard 200 album chart-ah hian ro an rel a, Nielsen Music/MRC Data aṭanga a lan dan chuan US-ah ringawt equivalent album unit 242,000 an hmu chhuak a, 177,000 zet hi album sales aṭanga an hmuh chhuah niin TEA unit 35,000 bakah SEA Unit 30,000 (on demand stream-ah an hlate vawi maktaduai 48.56 stream a ni) an hmu chhuak a ni.

Pahnihna chu Megan Three Stallion album thar 'Good News' kha niin pathumna chu Ariana Grande 'Positions' kha  ani thung.

Bangtan Boys ropui zia kan sawi fo tawh a, an ropuina an lantir nawn leh ṭhin. Tunkar rimawi khawvel titi luahtu ber chu BTS hi an ni miau a. Member pasarih awmna K-Pop star-te hian an single thar ber 'Life Goes On' chu Billboard Hot 100 chart-ah No.1 an nihpui bawk. Billboard Artist 100 chart-ah pawh tunge No.1 ni mek tia zawhna kan inzawt dawn a nih chuan a chhanna chu BTS bawk a ni. 

BTS-te hi a rualin Billboard 200 chart, Billboard Artist 100 chart leh Billboard Hot 100 chart-ah No.1 an ni rual ṭhawt. Artist zingah hetiang dinhmuna ding thei pakuana an ni a, group ang erawh chuan a hmasa ber an ni hial!

'Life Goes On' hi English ni lo ṭawng dang hla Hot 100-a No.1 ni thei hmasa ber a ni a,  Taylor Swift nen chiah kar khatah a ruala Hot 100 leh Billboard 200 chart-a No.1 ni thei an la ni bawk.

South Korea parliament chuan BTS vangin bill thar an pawm a, he bill thar hnuaiah hian K-Pop group lar BTS chuan kum 30 an tlin hma chuan sipai an ṭan ngei ngei a ngai dawn ta lo.

South Korea dan dinglaiah chuan kum 18 leh 28 inkarah sipaia an ṭan ngei ngei a ngai a, mahse Thawhlehni khan South Korea National Assembly chuan Military Service Act siamṭhatna pawmin BTS-te sipai ṭan hun hi an tikhawtlai ta a ni.  He dan thar hnuaiah hian K-Pop star-te chu kum 30 an tlin thleng sipai ṭan hun hi an tikhawtlai thei tawh dawn.

BTS tan a lawmawm lehzualna a awm. An member Kim Seok-jin, Jin tia hriat lar chu naktukah hian kum 28 a tling chiah dawn a, mahse kum 28 a tlin hmain he dan thar hi an pawm hman ta a ni.