Wahlberg-a hlawhtlinna chhan chu Pathian "Pathian ka rinna hian mi ṭha zawkah min siam" : Mark Wahlberg
Kristian ṭha a nihna thu kan sawi tawh ṭhin a, kan hria a, Kristian, ringtu ṭha a nihna hi Mark Wahlberg hian a zahpui lo mai ni loin a sawi chhuak fo zawk. Tun hnaia Square Mile chanchinbuin an kawmnaah 'Pathian ka rinna hian mi ṭha leh lakltlak zawkah min siam a, nitin ka ṭawngṭaia ka inkhawm ziah ṭhin a ni," a ti.
"Ka nuna pawimawh ber chu Pathian nena kan inlaichinna hi a ni. Pasal ṭha leh pa entawntlak ka nih theihna turin ni tin ka ṭawngṭai ziah ṭhin," a ti. A tunhma nun chhut let chuan chhuikir tur ṭha a nei lo ve hle. Mahse Pathiana taksa leh thlarau damna a chan aṭangin actor hlawhtling Mark Wahlberg nunzia hi nasa takin a inthlak a ni. US pawnah, film changa an kal a nih pawhin inkhawm a ṭhulh ngai lo.
Wahlberg chuan eizawnna lama a hlawhtlinna chhan ber chu a rinna hi niin a sawi bawk. Tun hmaa boy band lar hmasa leh influential tak mai, New Kids on the Block-ah pawh khan a lo tel ve tawh ṭhin a, thla thum emaw chauh a tel hnuah a chhuahsan a, chumi hnuah band an din veleh. Zai lam a chhuahsan a, movie lamah a lut a, a hlawhtling hle; Academy Awards-ah pawh ṭum hnih lai chu nominate a ni tawh.
"Ka rinna tel lo hi chuan ka nun hi ka thlak theih ka ring lo a, tuna khawvela ka dinhmun ang pawh hi kan chang pha lo viauin ka ring a ni," a ti.
Boston-ah Wahlberg hi a seilian a, tleirawl a nih lai aṭanga coaine addict ve mai ṭhin kha a ni. Vawi tam tak police-ten an man a, kum 16 a tlin kha chuan tualthah thubuai an awrhtir hial tawh. Heng zawng zawng hi sawi chhuah a ni leh ṭhin a, hman deuh pawh khan vun rawng inthliarna avanga tunhmaa mi kut a lo thlak tawh avangin court hmaah a inlan leh a nih kha. Heng thil a ngaihtuah let hian Wahlberg chuan, "Ka inchhirna thil tam tak ka lo ti tawh ṭhin a, chung ka tihsual man te chu ka hmu let nasa mawlh mawlh le a ni," a ti.
Catholic chhungkua aṭanga seilian a ni a, a pianthar theih nan hian an parish puithiam, Father James Flavin a inseng nasa a, amah pawhin a fak hle. "Ani hi engtik lai maha min thlahthlam lotu a ni. Ka nun danglam tura min kaihruaitu a ni," a ti