2025 Golden Globe Awards nomination puang; Nominee-ah la tlangzarh loh Squid Game 2 a tel

2025 Golden Globe Awards neih tur atana nonimation chu puan a ni ta a, 'Emilia Perez' film chuan nomination 10 hmuin a hmu hnem ber. Hetih lai hian TV category lamah la tlangzarh loh, Squid Game 2 chu nomination-ah a lang tel.

82nd annual Golden Globe Awards hi January 5, 2025-ah neih a ni dawn a, comedian Nikki Glaser-in a host ang. Hmeichhia zinga a mala Golden Globe host thei hmasa ber tur a ni. Category 27-ah award hi sem a ni dawn a, 'Hollywood's Party of the Year' tia sawi ṭhin, Golden Globe hi khawvela film leh television awards show lian ber a ni.

Nomination tih chhuahah hian Film category-ah hian Zoe Saldana, Selena Gomez leh Karla Sofia Gascon te channa, 'Emilia Perez' hnuaiah 'The Brutalist' awmin nomination pasarih a hmu a, 'Conclave' in paruk a hmu bawk. TV category lamah 'The Bear' che ṭha berin nomination panga a hmu a, 'Only Murders in the Building' leh 'Shogun' chuan pali ve ve an hmu.

Golden Globes 2025 nomination tih chhuahah hian sawi zui hlawh tak mai pakhat a awm a, chu chu Best Television Series - Drama nominee a Squid Game season 2 an telh hi a ni. Kum 2021-a tih chhuah, Squid Game1 khan nomination pathum hmuin, award pakhat a lo dawng tawh. Mahse Season 2 zawk hi tih chhuah a la ni lo a, tun thla tawp lama tih chhuah tur chauh tur a nih laiin, tlangzarh hmain nomination-ah a tel a ni. Mahse award official website chuan January 1, 2024 - December 31, 2024 chhunga series/movie chhuak a huam avangin 82nd Golden Globe Awards-ah hian telh thei a ni tiin an ṭang ve thung.