Mizoram Youth Festival 2024 ṭan a ni

Ni li awh tur, Mizoram Youth Festival 2024 chu nizan aṭang khan AR Lammualah hman ṭan a ni.

Nizana hun hman hi host T. Vanlalkima'n kaihruaiin, thusawi leh zai ngaihnawm tak takte ngaihthlak a nih bakah, lam leh ennawm dangte entir a ni bawk. Nizana inlante hi Territorial Staff Songsters, Gan Sabra, J. Lalchhandami, Timberl Display, Thawhlehnaniropuia, Second Wind, Khatla KṬP Fak Lam, Vanlalruati, Nathael Vanchhawng leh Christina Vanlalnghaki te an ni.

Zanin hian inkhawm banah hun hi hman chhunzawm a ni leh ang a, host C. Vanlalhruaizeli'n a kaihruai thung ang. Zanina hun hmang turte hi St Pauls HSS, Muanpuia Dreamhunter, Israela Pachuau & Vli Fanai, AMKA (Karate demonstration), Laldinsangin, Benjo RK Lalfakmawia, H. Rotluanga (Zephyr) leh Hmingte Chhangte te an ni.

Kumin hi Mizoram Youth Festival huaihawt ṭum lina a ni a, kumtinin organising committee hi a tharin an awm ṭhin. Krismas vuakvet hi mi tam takin thil ṭha lo tih ṭan phahna atan an hmang a, nu leh pa tam takin rilru hahdam loin an hman phah ṭhin. Hei vang hian Biakin lam hawi lote pawh huau huau hlimawm leh ṭha buatsaih sak a, he progamme kaltlanga Isua an chawimawi theihna turin he festival hi buatsaih ṭhin a ni. Thusawi ngaihnawm tak tak ngaihthlak a nih bakah, Mizorama kan artist leh performer ṭha te an inlan ziah dawn a ni. Festival neihna hmunah hian food court siam a ni tel bawk. Mizoram Youth Festival hi Zirtawpni zan thleng neih a ni ang.