Betea a rawn ropui thar

Pahnihna aṭangin a chhuk thla a, hnuai lam a pan mai tawh dawn emaw tih laiin Betea'n hma a rawn sawn a, Rainbow Ṭhazual Faknaah pakhatna a rawn hauh. Hmana Betea kha a la hlui lo a, Fakna hla huang chhungah chuan a la ropui reng tih a tichiang hle.

Betea hian a hla 'Lungchhir a sawt lo' hmangin Rainbow Ṭhazual Fakna chart-ah a ṭum khatna atan pakhatna a rawn hauh.

February 16 aṭang khan Betea leh a hla hi Ṭhazual chart-ah hian kan hmu ṭan a, hemi ṭum hian pakuana aṭangin bul a rawn ṭan a ni. March thla aṭang khan paruknaah a rawn chho a, March thlaa chart tihchhuah hnuhnun ber, March 30 kha chuan palina a kai chho tawh. April thlaah Betea'n hma a sawn ropui vak lo a, palina leh pathumnaah te a tlingtla a ni.

May thlaa chart tihchhuah hmasak ber, Fakna bikah khan pahnihnaah hma a rawn sawn chho a, pakhatna a luah mai a beiseiawm viau tawh laiin, May 25 khan pathumnaah bawk a let thla leh a ni. Betea hian hniam lam a pan rinawm viau tawh a, mahse tunah hma a rawn sawn a, beisei loh deuh hnuah pakhatna a rawn chuang chhuak ta a ni.

A hmaa pakhatna, TBC Zaithanpuia chu pahnihnaah a tla thla a, Bethsy chu pahnihna aṭangin palinaah daih a chhuk ta. Mahse amah leh Pensy nen, Temi Sailo nena an zaina, 'Mamawh chhanna Lal Isua' palina aṭangin pathumnaah a rawn chho ve leh ta thung. One in Christ chuan pangana an la luah lum zel e.

Synod Choir member, ṭhin, Vanlalpari chu, a music video hmasa ber nen top 10-ah rawn lang tharin pariatnaah bul a rawn ṭan a, T. Lalrinfela pawh kan hmu bawk. T. Lalrinfela hian 'Lalpa hmantlak' tih hla hmangin top 10-ah hian pakuanaah a rawn lang thar a, Ark of Melody 'Thlarau Thianghlim hruai' tih chu top 10-ah an rawn lang thar bawk. Maggie, Lalruatfeli Bawitlung feat Project Fishtail leh Temi Sailo hla 'Kraws thu' te chu top 10 aṭangin an chhuak ta.