Box Office: 'Moana 2' a che ṭha chhunzawm zel

Animated adventure 'Moana 2' chu North American box office-ah a kar hnihna atan hma hruaitu a la ni chhunzawm a, USD mtd 52 a lak luh belh leh. North America bikah USD mtd 300 la lut tling tawhin, khawvel huapa a sum hmuh hi USD 600 a chuang tawh bawk.

Walt Disney Animation hian tlangzarh karah khan record siamin, Thanksgiving kara animation zinga sum la lut tam ber a ni thei a ni. A kar hnihnaah hian North America-ah entu hi 63% in a tlahniam tawh a; mahse ram dang, a bikin Asian market lamah a che ṭha chhunzawm hle a, hei vang hian kumina film chhuak zinga hlawhtling ber zingah a tel der tawh a ni. France, Italy, Germany, Poland, South Africa, leh Kazakhstan-ah chuan 2024 Hollywood film tih chhuah zinga sum la lut tam panga zingah a lang pha tawh.

A kar thumnaa USD mtd 34.9 la lut thei, 'Wicked' chu No 2-ah a la ding nghet bawk. Cynthia Eviro leh Ariana Grande te channa, broadway musical adaptation hian USD mtd 455.5 a la lut tling tawh a ni.

Paramount film, 'Gladiator II' chu No 3-ah awmin, USD mtd 12.5 a hmuh belh leh. Rome lal ram zahawmna din thar leh tura Lucius-a'n roreltu rawng tak takte a beih letna film hi Ridley Scott direct a ni. No 4-ah Dwayne Johnson leh Chris Evans te channa, action comedy 'Red One' a awm a, Indian Telugu film, 'Pushpa : The Rule -Part 2' chuan USD mtd 9.3 la lutin Top 5 ah a lang ve bawk.