Boom-a hmingchawi guitar amp thar

India ramah guitarist tam tak an lo chhuak tawh a, mahse guitarist mal hmingchawia guitar amp tihchhuah erawh a la awm ngai lo. A hmasa ber turin Mizo guitarist, Boomboom-a hmingchawiin Theta Audio chuan guitar amp a tichhuak.

Theta Audio hi Pune-a hmunpui ber nei an ni a, India-ah chuan guitar leh music bungraw siamchhuaktu lian pawl tak an ni. Tuna power amplification an siam chhuah, Boomboom-a hmingchawia an siam hi Rs. 26,000 man tur a ni a, prototype hi Boomboom-a hnenah an thawn phawt a, ani'n a duh ang zan a nih leh nih loh a lo endik leh a ni.

Power amp dangte nena a danglamna tur chu a design leh voicing zawng zawng hi Boomboom-a'n a duh ang chiaha a duan a ni a, prototype-ah hian a duh loh ang eng emaw a awm a, technical defect te a awm chuan a siamṭhattir leh dawn a ni.

"India rama guitarist hminga power amp tihchhuah hmasak ber ka ni thei hi ka lawm hle. Voicing zawng zawng hi keiman ka design a ni a, ka duh dan anga ka siamtir a ni ber. Kan ṭhian nu, thla la thiam, Cindy hian Theta Audio nen hian min inhmelhriattir a, ka guitar play leh ka performance te an thlirin min duh ve a niang, ka hmingin power amp hi kan siam ta a ni. Mass production tur a ni a, a duh tan chuan keiman ka chahsak thei. Hetiang lama kan hriat lar, Marshall te nen a ri pek chhuah leh a ṭhat lamah chuan intluk tura ngaih a ni a, mahse a manah erawh chuan Marshall te ai chuan a tlawm zawk dawn a ni," a ti.