Khiangte Construction Ṭhazual Lengzemah Mendal a langsar leh e

Lengzem artist boruak nei lian zinga mi, Mendal chuan ama phuah ngei, 'I hai der em ni' tih hmangin Khiangte Construction Ṭhazual Lengzem chart tharah hma a rawn hruai leh e.

Ṭhazual chart-ah hian Mendal hi a mikhual lo hle a, a hla hrang hrangte lo lanpui tawhin, No 1 dinhmun pawh a lo hauhpui fo tawh bawk. A zaithiam bakah hla phuah a thiam a, hla mawi tak tak, ngaithlatute tana feel awl tak mai a rawn chhawp chhuak fo mai. 'I hai der em ni' hi September 12, 2024-a a tih chhuah kha niin, ngaihthlak leh thlir a hlawh leh hle a, 1 million view pawh a nei tling tawh. Music leh recording hi Smiley niin, video hi Osiama Pictures kut chhuak a ni. He music video hi Joshua Construction sponsor a ni bawk.

Latei Hringen pawhin a hla phuah, 'Par ang' tih chu No 2-ah a rawn lanpui bawk. Music leh recording hi Omega ah tiin, video hi Osiama Pictures siam bawk a ni. A music video hi September 27 khan a ti chhuak a ni. Smiley x Hex Da Marshall 'Min hrilh rawh' pawhin chart hmasa aṭanga hma sawnin No 3-ah rawn chho. Mary Dawngi 'Thinlung tehna' leh Rosalind Khawlhring 'Pu Zinga' te pawh Top 5 an rawn lang ta.

Ṭhazual Lengzem Top 10-ah hian Zaii Hauchhum leh Saka an la cham chhunzawm a, anni bakah Lma ft Mendal, Smiley leh Mic Khan x Mazuali K te an lang thar ve bawk.