Box Office: 'Kraven the Hunter'-in danglamna thlen zo lo

Ngaihven hlawh, Spider-Man spin-off, 'Kraven the Hunter' chu beisei angin a thawm a ring ta lo a, North American box office-a hmahruaitu 'Moana 2' dinhmun a sawi nghing pha lo.

'Moana 2 ' hian a kar thumnaah pawh Box office-ah No 1 a nih chhunzawm zel a, USD mtd 26.6 lak luh belhin, khawvel huapa a sum hmuh chhuah hi USD mtd 717 a tling ta. Animated adventure hian entu a la ngah hle. 'Wicked' pawh a la che ṭha zel a, kar liam ta chhungin USD mtd 22.5 chuang hmu lehin, a sum lak luh hi USD mtd 525 a tling ve tawh bawk.

'Kraven the Hunter' chu Aaron Taylor-Johnson star power pawhin No 1-ah a rawn vawrh zo ta lo. Tlangzarh hmain boruak nei lian hle mah se beisei ang a ni ta lo a, Rotten Tomatoes-ah pawh 15% chauh nin, CinemaScore-ah pawh 'C' grade chauh a hmu pha a ni. Tlangzarh karah USD mtd 11 a la lut a, audience zingah superhero trend an hne ṭan deuh emaw a ni tih theih hial. 'Gladiator II' chu No 4-ah a la awm zel a, Ridley Scott sequel hian USD mtd 398.5 a hmu chhuak tawh a ni. Top 5-ah USD mtd 6.4 la luttu, tlangzarh thar 'The Lord of the Rings : The War or the Rohirrim' a lang bawk a ni.

Kum a tawp dawn hnai a, box office lam thawm reh deuh pawh tlangzarh tur, 'Mufasa: The Lion King' leh 'Sonic the Hedgehog 3' ten boruak an rawn vuak hot deuh erawh a beiseiawm hle. 'Mufasa: The Lion King' hi December 20 leh 'Sonic the Hedgehog 3' hi January 3, 2025 ah tlangzarh an ni ang.