'Inchhirna aiin Simna a pawimawh zawk' Joseph-an Kelkang harhna ropui a ti

Kelkang harhnain Zoram a tuam a, mi tam ber titi leh ngaihtuahna a luah a, zaithiam, tuna Synod Revival speaker zinga mi Joseph Zaihmingthanga chuan Kelkang Harhna chu ropui a ti a, Thlarau Thianghlim hnathawh chu a hmunah ngei kal chilh ve a châk viau a, mahse rawngbawlna peng danga chhuahna tur an ngah avangin a la kal hman lo. Joseph-a hian 'Kelkang harhna hi a ropui ka ti a, mi tam takin an sualte avanga inchhirna an nei a, mahse inchhirnaah ringawt hian a tawp ang tih ka hlau hle a ni," a ti.

"Thlarau Thianghlim che vel hian an ngaihtuahna a ti thar a, mi tam takin an sualna hriain an inchhir a, an ṭap zawih zawih a, a lawmawm hle. Amaherawhchu inchhirna ringawt hi a tawk lo a, simna a pawimawh zawk a ni," a ti.

"Thil pawimawh tak mai chu phurna zawng zawng a reh hnua Pathianin a tihchet theih nun neih hi a ni," tiin Joseph-a chuan a sawi. "Kelkanga harhna chan tuma kal tam tak hian mihring nun thleng tak tak an rawn hawn lo ṭhinin ka hmu a, phurna hi an rawn hawn a ni fo. Mizoin kan mamawh ṭhin chu khuang leh zaiin a siam nun ni lo, thutakin a khawih chet nun hi a ni," a ti.

"Harhna chang inti leh a hmun­ah ngei pawh mi ṭhen­khat chuan Krista leh a kraws chanchin an tuipui tâwk lo ṭhinin ka hria a, ka thikthu ka lo tichhe deuh ṭhin. Krista leh a kraws thu hi kan buaipui tur leh kan nun laipui luahtu ni thei se a duhawmin a lawmawm hle ang," a ti bawk.

Joseph-a chuan Kelkang harhna chu ropui a tih thu a sawi a, tualchhungah aiin Thlarau Thiang­hlim a che nasa niin a hria a, mimal nuna Thlarau Thiang­hlim kan neih bakah hian huhoa rawng chak zawka kan bawl a, kan inpumkhat zawk theih nan huhoa Thlarau Thianghlim hnathawh kan chan pawh hi a pawimawh hle tih a sawi bawk.