Leonardo-an French chanchinbu a khing dawn

Actor thiam Leonardo DiCaprio chuan French chanchinbu pakhat chu a chanchin dik lo taka an chhuah avangin court-ah khin a tum.

French chanchinbu hi Oops! a ni a, May 13 chhuakah khan Leonardo leh Rihanna te hian fa an nei niin a ziak a ni. He chanchinbu hian hei mai duh tawk loin, Leonardo hian a fa hi a ngaihsak lo a, engah mah a ngai lo niin a ziak bawk.

Leonardo hian Oops! chanchinbu hi court-ah khinna a thehlut a, dawt muhluma amah an tihhmingchhiat avangin French danin hremna a pek nat theih ber, Euro 18,000 chawi turin a phut a ni. Hei mai bakah hian Leonardo chanchin leh thlalak reng reng chhuah phal ve lo tura court-a thlen a ni.

Oops! chanchinbu neitu Frederic Truskolaski chuan Leonardo-an an chanchinbu a khing tih a hriatin mak a ti hle tih a sawi a, an chanchinbuin Leonardo leh Rihanna chungchang an chhuah chu a dik lo tih a pawm bawk. An staff te chuan Rihanna leh Leonardo te an awm dun fo tih erawh an hria a, Rihanna rai leh rai loh erawh chu an finfiah thei bik lo tih a sawi bawk.