Super Trio hla an la peih thei lo
Super Trio-in kumin kumtir aṭanga an buaipui tawh, 'Tlangah sawn tlân rawh' tih chu Robert Lalduhzuala, Vanlalsailova leh Joseph Zaihmingthanga te chuan an hun neih ang angah an buaipui bek bek a, mahse engtikah nge an peih theih ang tih erawh an sawi thei lo.
Joseph-a chuan, "Hun kan nei ta mang lo a, kei leh Sailoa hi crusade leh rawngbawlin kan chhuak reng a, Robert-a pawh rawngbawlna lamah a buaiin a hmanhlel em em bawk a, chuvang chuan duh angin kan kal chak thei lo. Tunah hian 80% vel chu a shooting kan zo tawh a, indoor lam shoot a la ngai a, mahse engtikah nge kan chhunzawm theih ang tih ka hre lo," a ti.
Joseph-a bik hi April leh May thla chhung khan home crusade-in a buai tluan a ni ber a, tunkar tawp lam aṭang hian thingtlang hmun hrang hrangah crusade turin an chhuak ṭan dawn a, September thla thleng deuh thaw chu hunawl an nei tawh mang lo.
'Tlangah sawn tlan rawh' tih hi Joseph-a phuah a ni a, 'Ka dai zel dawn' tihte nen khan a music kalhmang a inang lo deuh ang. "Tlêm chuan a danglam deuh turah ka ngai a, alternative lam a pawl lek lek ang," a ti.