'Mi Bo' a chhuak dawn e

Mizo film thar, 'MiBo (Missing Person)' chu zanin hian Vanapa Hall-ah tlangzarh a ni dawn a, zan dar 8-ah chhuah a ni ang. Zanin aṭang vekin Lersia Play-ah en theih a ni bawk ang. He film hi kumina Lersia Play aṭanga film tih chhuah hnuhnung ber tur a ni.

“Mi Bo” film hi BISP.FILMS kutchhuak niin Mizo Film khawvela a vawikhatna atan khawvel pum huapa company lar tak FUJIFILM X India nen ṭangkawpa siam a ni a, FUJIFILM company bungrua leh Film Simulation hmanga shoot a ni a, a film hmelhmang pawh nasa takin a danglam dawn a ni. Shop At 13th dawrin an sponsor bawk.

Director leh writer Raymond Colney chuan “Kan film siam ve tawh zawng zawngah tuna kan film thar tur hi a la danglam ber a ni. Mi zawng zawng huapzo tur chi niin, Mizo ten kan la neih tlem em em Krismas thu thlan hmanga thawnthu siam a ni a, chhungkuaa en theih tur, unau in hmangaihna hlutzia lantirna film a ni” tiin a sawi. 'Mi Bo' film hi Human Drama genre niin fahrah unau inhmangaihna chu hna leh natna leh rualawhnain zawi muanga khi chat a siam chhoh dan thawnthu a ni a, minute 92 awh a ni.

Mizo Film Award 2024 neih zawh taka Best Actor lawmman dawngtu, Maruata Rawite leh Zoparmawii te main character an ni dawn a, “Kan film chan tawh zawng zawngah harsa ka la tih ber a ni a, mittui tlakna scene a awm avangin a tir atangin ka huphurh em em a, mahse keimah bikah chuan ka la perform ṭhatna ber film niin ka hria” tiin Maruata Rawite chuan a sawi.