Lersia Play-in kuminah film 44 pe chhuak

Mizo film streaming platform lar, Lersia Play chuan Ningani, December 19,2024 khan kumin chhunga an film tih chhuah hnuhnung ber tur siamtu, production company BISP.Films nen MJA Press Club ah thuthar thehdarh tute kawmin hun an hmang a, hemi hunah hian Lersia Play chungchang kimchang an tarlang nghal a ni.

Lersia Play hi kum 2021 khan Lailen leh Leitlang Pictures ṭangkawpin an din niin sorkar leh mimal aṭanga puihna leh investment tel loa an din a ni. Leitlang Picture hian film production lamah in sawrbing duh avangin 2022 June aṭang khan Lailen hian a vaiin an enkawl chhunzawm ta a ni.

Lersia Play Chief Executive Officer Gospel Ramdinmawia hian an apps aṭanga film pek chhuah a nih dante sawiin, Lersia Play kaltlanga feature film tih chhuah tawh zawng zawng hi film 110 niin heng zingah hian Short film 9 leh Series 5 an tel. Kumin bikah film 44 tih chhuah tawh niin heng aṭang hian hlawkna hi Rs vbc 6 an tel tawh. Lersia Play an hawn tirh aṭanga hlawkna an tel tawh zawng zawng hi Rs vbc 12 a tling tawh bawk.

CEO Ramdinmawia chuan kumin chhung hian Lersia play aṭang hian kumdang aiin film tih chhuah a tam fal hle tih sawiin, hei hi Mizo zingah film siam hi eizawnna tlak a ni tih lan tirtu nia a hriat thu a sawi. An apps kaltlanga film ti chhuaktute nen hian hlawkna in sem dan tur ruahmanna fel tak an siam a, film siamtu lam hian sum lakluh aṭanga 65% an chan laiin Lersia Play lam hian 35% an chang ve thung niin a tarlang. Kum thar aṭang chuan Film hmuhnawm lo leisual tih tlem a nih theih nan screening uluk lehzual a kalpui tum.