Bollywoood Filmmaker liante'n SSR ruihhlo an tihhmuh: Rhea

Sushant Singh Rajput thihnain nghawng a nei lian chho zel a, a ngaihzawng Rhea Chakraborty meuh pawh fihlim loa ngaiin ruihhlo kaihhnawihah man a ni ta, Narcotics Control Bureau hnena ruihhlo chungchanga a inpuanna chuan Bollywood star tam tak rilruah hlauhthawnna a tuh ngei dawn niin a lang.

Media ṭhenkhatin an tarlan dan chuan Rhea Chakraborty hian filmmaker liante'n Sushant Singh Rajput kha ruihhlo an tihhmuh tih a sawi a,  cocaine, LSD leh Marijuana tihna party-ahte pawh an hruai niin a sawi. CNN News 18 phei chuan Chakraborty hian SSR ngei pawh khan hemi chungchang hi an inngaihzawn lai khan a hrilh niin an tarlang a ni.

Rhea hian film industry-ah chuan ruihhlo a hluar hle tihte pawh a sawi niin an tarlang lehzel a, lemchan thiam mipa pahnih lar tak leh thil tithei takte chuan Sushant hi ruihhlo an pe niin a sawi tihte pawh an tarlang bawk. SSR-a Lonavla farmhouse pawh a B-town ṭhiante chuan drug party neihna atan an hmang nia a sawi thute pawh an tarlang. Amah Rhea tak hi chuan chung party chu a chhim ve ngai loh thu a sawi thung.

Times Now-in an report dan chuan Rhea hian ruihhlo kaihhnawihah actor lar tak tak 25 hming a lamri a, chung zingah chuan Sara Ali Khan, Rakul Preet Singh leh fashion designer Simmone Khambatta-te hming pawh tarlan a ni a, midang hming erawh tarlan a la ni ve rih lo.