Mizo Idol aṭanga kan hriat Awmawmi leh Tluanga An la inkawp zui zel

Mizo Idol 2013-a 'Krista lungpui nghet' tih hla an sak aṭang khan Awmawmi leh Tluanga te zai lamah an la inkawp zui zel a, he hla, an hlawhtlinpui tawh kha music video-a siamin an rawn tichhuak ta.

Zaithiam hranghlui, K. Lalchamliana fanu Lalawmpuii Khiangte leh K. Lalrintluanga te hian Mizo Idol 2013-ah khan 'Krista lungpui nghet' tih hla sain, Top 10 aṭangin Top 5 an inhlankai theih phah a, kha an hlawhtlinna hla kha hlawhtlinpui zel an tum.

Idol hnua music video an siam hmasak ber ve ve tur a ni a, hla ngai bawk an sa leh tur hi zawhna a awm mai thei, mahse Awmawmi chuan, "He hla hian kan lung a len a, kan inti neitu nghal em em a, hla dang kan hawi thei lo a ni," a ti. Idol-a an sak dan ang ngau ngau kha chuan an sa dawn tawh lo a, tlemin an tidanglam ang. "Tlem tlem kan siam danglam zeuh zeuh a, mahse kan sak dan ang kha chu kan kalsan lo ang," a ti.

Zoram pum huapa zaithim lar ṭhin fanu a ni a, a music video velah pawh hian buaipuitu a nei ṭha a, a chhungte pawhin an phurpui hle. "Ka chhungten min phurpui em em a, kawng engkimah min ṭawiawm a ni," a ti.

Awmawmi hian Class XII a zo tawh a, medical entrance lam a hawi a, a hmachhawn a, a result erawh a la hriat loh. "Medical science lam hi ka tum a, doctor nih ka chak a, mahse a theih loh pawn medical lamah hrim hrim ka kal ang," a ti. A lo tlin palh chuan zai lam a chunzawm ṭha hlei thei tawh dawn si lo a, tuna mi bak hi hnuhma a nei ang em tih zawhna chu, "Tunah pawh hian ka buaipui ṭan mek," tiin a chhang.

"Tuna kan buaipui mek hi ram ngaih hla lam pang daih a ni a, recording vl pawh kan buaipui ṭan chho mek a, YMA Day zawh hi chuan shooting pawh kan ti thei tawhin ka ring," a ti. Ram ngaih hla a sak chuan, Gospel aṭangin a peng ang em tih thuah, "Peng lo ang, he bak hi chu nakin zelah pawh Fakna hla tho ka sak chhunzawm ang," a ti.

Awmawmi leh Tluanga te hi Mizo Idol 2013-ah khan tel ve vein, top 5 an thleng pha a ni.