Kylie leh Kendall Jenner Tunlai tleirawlte thlir rawn

An hmui khawih danglam leh danglam loh mai mai pawh twitter leh social media danga inhnialpui luih luih tham khawpa tunlai tleirawl zinga khawvelin a thlir rawnte pahnih - Kylie Leh Kendall Jenner te hi anmahni chauh ni loin an chhungkua zawng zawng nen hian khawvelin a thlir an ni.

An pa ber, Bruce Jenner chu tunlai damdawi thiamna hmangin hmeichhiaah a inlet ta daih bawk sia, tunah tak chuan pa pawh an nei tawh lo! Bruce Jenner kha Caitlyn Jenner a ni ta. Kim Kardashian te nen hian nu hmun pa hrang an ni.

Kendall Jenner hi a upa zawk a ni a, November 3, 1995-a piang kha a ni; fashion model a ni a, TV personality a ni bawk. A san lamah chuan ft. 5 leh inchi 10.5 zeta sang a ni. Kylie Jenner hi a naupang zawk a ni a, kum 1997 August 10-a piang kha a ni thung a, ani pawh hi model tho niin, sum pawh a ngah viau a niang, kumin February thla khan California-a Calabasa-ah dollar mtd 2.7 zet man in a lei.

Kendall Jenner hi high school an kal lai chuan cheerleader hotu a ni ṭhin. Chocolate a ngaina lo a, a ei ngai lo. A ram tlawh châk leh nuam a tih ber chu Greece ram a ni. Kum 14 a nih aṭangin model lamah hian a kal tawh a, a rawng duh ber chu nawinawk (purple) a ni. Kylie aiin a mizia a zawi zawk. Kum 2013 aṭanga 14 inkar vel khan Harry Styles nen an lo ni ve zuai tawh a, Taylor Lautner nen an inkawmngeih hle a, inngaizawng ang lama inkawmngeih erawh an ni lo. A hausakna hi tunah hian dollar mtd2 hu vel lai a ni tawh. Hriat ve mai mai atan, a u, Khloe nen hian an pheikhawk bun tawk a inang chiah!

Kylie Jenner hian TV film leh show a en tam hle a, show hmuhnawm a tih ber chu American Horror Story a ni. The Vampire Diaries pawh hmuhnawm a ti hle. Athletic sports lam a tuipui a, intlansiakte hi a tuina zawng tak a ni. Ngaihzawng lamah chuan Aaron Carter leh Will Smith-a fapa, Jaden Smith te a ngaizawng tawh niin an sawi; a la naupang a, ngaihzawng lam hi chu an sawi vak lo a, mahse tunah hian rapper Tyga nen an in-date niin an sawi.