Retire turin THOR a la naupang lua

Tunhnaiah Chris Hemsworth-a'n 'Thor: Love and Thunder' zawh hnuah Marvel Cinematic Universe a chhuahsan tawh dawn niin thuthang a awm a, mahse Hemsworth chuan thudik a nih loh thu a sawi chhuak.

God of Thunder role hnehsawh taka changtu Chris Hemsworth chuan Elle Man magazine-in an kawmnaah hemi chungchang hi a sawi chhuak a, Elle Man-in an zawhna chhangin,"Eng retirement period mah ka nei rih dawn lo. Chutiang tur chuan Thor hi a la naupang lua a ni. Kum 1,500 chauh alawm a la nih!," tiin fiamthu titakin a sawi a, Thor chu mangṭha mai a la tum loh thu leh chu chu a beiseina pawh a la nih thu a sawi.

Thor-a tuboh chu hum chhunzawm a la tum hmel hle nghe nghe zawk a, kum 37 lai ni ve tawh Chris Hemsworth chuan 'Thor' film palina chan leh chu chakawm a tih thu sawiin script a chhiar hnu phei chuan a phur tawh hle tih a sawi hial zawk. "Avengers: Endgame-a engkim a thlen hnua MCU peng pakhat ka la nih chhunzawm a, Thor thawnthua ka la tel chhunzawm hi ka lawm hle a ni," a ti.

Taika Waititi direct 'Thor: Love and Thunder' chu February 2022-ah tlangzarh tura ruahman a ni a, Jane Foster lema Natalie Portman kan hmu leh dawn a,  Tessa Thompson leh Christian Bale-te pawh an inlan dawn.

Film an chang ṭan tawh em tih official-a sawilan a la ni lo a, mahse Natalie hi Australia lama hmuh a nih avangin mi tam tak chuan bul an ṭan tawh niin an ngai.

Chris Hemsworth inlanna 'Thor' film hmasa ber kha kum 2011-a tlangzarh a ni a, kum 2013 khan 'Thor: The Dark World' chu tlangzarh niin kum 2017 khan 'Thor: Ragnarok' tlangzarh leh a ni a, 'Thor: Love and Thunder' hi Thor series lina tur a ni tawh dawn.

Thor film series pangngai bakah hian Avengers film series-ahte Hemsworth hian God of Thunder thuam hi a inbel bawk a, lemchan khawvelah chuan khawvela sum hailut tam ber zinga mi a ni mek bawk. A insawi ang hi a dik a nih chuan Thor film palina tur piah lamah pawh hian kan la hmuh chhunzawm zel mai thei a ni.