'Wonder Woman 1984' Krismas hmain kan hmu dawn lo

DC Movie kumina chhuak tur zinga nghahhlelhawm ber pawl 'Wonder Woman 1984' chu tlangzarh hun sawn hlat a ni leh ta a, kumin Krismas hma chuan kan en hman dawn ta lo niin a lang.

Wonder Woman part II hi Krismas niah tak tlangzarh tura sawn hlat a ni leh ta zawk a, tlangzarh hun tura an ruahmanna siam hmasa ber aiin kum khat laiin tlangzarh hun tur hi an sawn hla tawh a ni.

Ruahmanna an siam hmasa berah chuan nikum December khan tlangzarh an tum a, mahse  Star Wars: The Rise of Skywalker vang khan kumin June-a tlangzarh tur khan an sawn a, hei pawh hi hripui leng vangin sawn hlat a ni leh a, October-a tlangzarh an tum chu Zirtawpni liam ta khan sawn hlat a nih thu an puangzarh leh ta a ni.

Director Patty Jenkins chuan thuchhuah siamin big screen-a mi zawng zawng en theiha chhuah chu pawimawh an tih bawk si avangin fan-te chuan an la nghah leh det rih a ngai dawn tih a sawi.

US-ah khuan hripui leng vanga inkhar theatre tam tak chu an inhawng leh tawh a, Christopher Nolan-a film 'Tenet' pawh kha theatre 3k dawnah an chhuah tawh a, chuti chung chuan WW 1984 hi an la tlangzarh ngam chiah lo niin a lang.

Kum tawp lamah hian film lian en tur erawh a awm nual dawn tih a chiang tawh a, November hian James Bond thar ber 'No Time to Die' tlangzarh a ni dawn a, 'Black Widow' pawh ruahmanna dang an siam leh a nih loh chuan tlangzarh a ni dawn bawk.

India ram erawh hripui hluarna ber ram a ni chho mek a, hripui kai tam lamah US pha lo mah se ni khata hri kai hmuh chhuah nasa takin an pung chho ta zel si a, India ram theatre-ahte chuan heng film tam ber hi kumin chhung chuan tlangzarh a nih a beiseiawm loh hle thung.