Mi harsate pualin MDM Winter Blast 2024

Music Domain Mizoram (MDM) chuan a din tirh aṭangin ṭanpui ngaite pualin kum tin a luangchhuak ṭhin a; vantlang kawngsirah leh Lammualah Charity Concert a buatsaih ṭhin. Kuminah pawh Thawhṭanni, December 23 hian AR Lammualah 'MDM Winter Blast 2024' Charity Concert a buatsaih leh dawn.

MDM hian kum 2022 khan Lammualah Charity Concert a lo buatsaih tawh a, mipuite thawh khawm aṭangin mi harsa zawkte ṭanpuina turin Rs nuai 1 leh sing riat chuang an hmu chhuak a ni.

Kuminah hian Lammual bikah a vawi hnihna Charity Concert hi a buatsaih leh dawn a, chhun dar 12 aṭanga zan dar 10 thleng hun hman a ni ang. Concert hi chhawng li (4) a neih tura duan a ni a, a hmunah ei tur chi hrang hrang lei tur a awm dawn bawk. Mizoram top artist leh band ṭha tak tak an zai dawn bakah Cosplay, Fashion show bakah mit ti tlai tur thil chi hrang hrang hmuhnawm tak tak thlir tur a awm dawn.

MDM hian he hun buatsaih tur hian Department, pâwl leh mimal aṭangin sponsorship a hmu a ni. Art & Culture Department, Active Sound, Tluangpuii Hmar, Aries Boutique, Elva Moda, Mizoram Cosplay Organization, Blue Mountain, Mark Advertising leh Kawllen Cultural Club-te hi mi harsa zawkte pual Concert 'MDM Winter Blast 2024' atan hian a thawhpui dawn a ni.