Zaninah Secondhand Serenade concert

American one man band, Secondhand Serenade John Vesely, Winter Festival 2024 kharnaa zai tura sawm chuan December 19, 2024 khan Aizawl lo thlengin, zaninah AR Lammualah concert a nei dawn.

John Vesely hian nimin khan Royale Lalawi Hotel-ah press conference neiin, Aizawl a rawn thlen hnuah Winter Festival pawh a chhim nghal a, zaithiamte performance pawh ṭha a tih thu a sawi. India ram chu a vawikhat rawn kalna a nih thu sawiin an lo dawnsawn danah pawh a lawm thu a sawi bawk. Mizoramah amah ngaisang a, a hla ngaithlatu tam tak an lo awm chuan a tih phur thu te, zanin Winter Festival khar zana perform pawh a chak tawh thu a sawi a ni.

Vesely hi Aizawlah ni thum chhung a cham dawn a, hemi chhung hian Reiek tlang pawh a tlawh dawn a ni. Kumthar January aṭang hian zaithiam dang te nen thawk hoin hla thar genre pangngai anga a release tur thu a sawi bawk.

AR Lammuala Winter Festival kharna neih turah hian a hmunah ticket lei theih a nih tur thu a buatsaihtu Hopecore-azl chuan an sawi.