Mizo film thar 'Lungdumtu' August-ah
House No. 109 leh Mission film aṭanga Mizo mipuite'n lemchan lama kan hmelhriat, Mapuia, Leitlang Pictures chuan 'Lungdumtu' film a buatsaih mek a, August thlaa Mizoram puma tihchhuah hman beisei a ni.
Lungdumtu hi a film producer PC Mawia ziah a ni a, Aizawl leh a chhehvelah shooting neih niin, shooting zawh a ni tawh a, editing ti turin Director Mapuia leh a crew te'n studio an ṭhutchilh mek.
Mapuia chuan Vanglaini palai zawhna chhangin, an film siam mek chu love story ngialngan film a siam hmasa ber a nih avanga a tan chona thar a nih thu leh a ṭan nasat phah thu a sawi. Lungdumtu film an siam mekah hian an bungraw hman- camera, sound leh light te a ṭhat avangin a picture quality pawh a sang dawn a, a technical thilah chuan a hmaa film an lo siam tawhte aiin a sang dawn a ni.
Mapuia chuan an lo tih ṭhin tawh angin film thar hi an peihfel hun chuan Mizoram hmun hrang hrangah mipuite en theih tura tihchhuah leh an tum thu a sawi a, a hrechiang duh chuan amah an biak reng theih thu a sawi bawk.