Salma Hayek-in plastic surgery a duh lo

Mexican-American actress chhelo Salma Hayek chuan mawi duh luat vanga plastic surgery tih chu thil hlauhawm tak nia a hriat thu a sawi.

Kum 48-a upa actress chuan, "Taksa leh hmel mawina ngaihsak luat vanga risk lian tak lak hi ka ti ve ngai lo. Ka ngaihdan chuan plastic surgery tluka risk lian hi a awm lo a, tun dinhmunah chuan tih chakna ka nei lo a ni," tiin mawi duhluat vanga a taksa lamin a tawrh a hlauhthawn zawk thu a sawi.

Ama hming chawia cosmetics company Nuance Salma Hayek tih siamtu actress chuan, "Mi ṭhenkhat chuan plastic surgery tih vanga vun chuar thei lo tur leh naupang thei ang bera lan an inbeisei a, mahse heng mite hnena ka sawi duh chu in taksa mawi tak kha mawi duh luat vangin tichhe suh u. A bik takin kum naupang tak chunga tih phei chu a ṭha lo lehzual a ni," tiin mihring thiamna hmanga hmai siam ṭhat tum chu thil hlauhawm tak a nih thu a sawi.