Mawitei music video thar a chhuak hnai

Tleirawlte nichungin mizo hmei­chhe gospel band 'The Chosen' aṭangin kan hmelhriat ṭan a, a aw mawi tak hmanga a zuna min uai tir ṭhintu Mawitei chuan Dr Luke guitarist Mamuana nena music video thar an siam 'A thlamuan ang che' tih hla hmangin min awi leh dawn hnai ta.

Dr Luke guitarist Mamuana leh an bassist Ruata te hlaphuah 'A thlamuan ang che' tih chungchang hi sawiin Mawitei chuan ,"Ka hla thar hi nun beidawng leh chau te Pathian hnen pan tura sawmna a ni a, khawvela lawmna leh hlimna zawng ṭhin te'n Pathian hnen an pan chuan thlamuanna famkim an chan tur thu puanchhuahna hla a ni," a ti.

Ama puala a music video hmasa ber 'Ka thlang ber zel ang che' tih hmanga ZONET ṭhazual faknaa thlan ber lo hlawh fo tawh Mawitei music video thar tur hi SVP kutchhuak niin India khawpui Delhi-ah shooting hi neih a ni a, en tlak leh ngaihthlak tlak tak ni tura beisei a ni.

Engtikah nge Mawitei music video thar nghahlelhawm tak hi kan hmuh theih dawn a la chiang lo a, editing khawih mek niin rei tak nghah ngai tawh lo tura ngaih a ni.