Best album of 2024-ah Charli XCX 'Brat'

BBC News in 'poll of polls' a buatsaihah kum 2024-a album tih chhuah zinga ṭha berah Charli XCX 'Brat' chu thlan a ni. He album hi Charli XCX studio album parukna niin, June 4-a a tih chhuah kha a ni.

BBC poll hi khawvel huapa music magazine lar ber ber 'super ranking' siam aṭanga lak a ni. Heng zingah hian NME, Rolling Stone, Spain rama Mondo Sonoro leh France rama Les Inrockuptibles te pawh an tel. List tina an position azirin point pek a ni a, pakhatna hian point 20 hmuin pahnihnain point 19 a hmu.

Critics-te chuan album ṭha bera an thlan, 'Brat' hi an fak hle a, 'pop music for the future' te an ti hial. Point 486 hmuin, a pahnihna Beyonce 'Cowboy Carter' aiin a let dawnin a hmu tam a ni. Charli XCX hian a album a tih chhuah dawn hian mi tam tak duhzawng chi a nih a rin loh thu a sawi a, mahse amah ngei pawhin a beisei phak bakin a rawn chet ṭhatpui a ni. Grammys-ah nomination pasarih zet a hmu thei a, Collins Dictionary chuan 'brats' chu word of the year-ah a puang zui bawk.

'Brat' hi UK, Australia leh Ireland-ahte No 1 niin, ram dang 12-ah Top 10-ah a lang bawk a, heng zingah hian US pawh. Billboard 200 album chart-ah pawh No 3 a ni bawk. June 10, 2024 khan a deluxe edition, 'Brat and It's the Same but There's Three More Songs So It's Not' ti chhuakin hla pathum a dah belh a, October 11-ah remix album, 'Brat and It's Completely Different but Also Still Brat' chu ti chhual lehin, guest artist 20 a thawhpui tel a ni.