Denzel Washington-a'n baptisma a chang

Hollywood actor, Oscar award pawh vawi hnih lo dawng tawh, Denzel Washington chuan Inrinni liam ta khan New York City-a God in Christ kohhran biak-in, Kelly Temple Churh-ah baptisma a chang a, minister license pawh nei nghalin, pastor-a ordain theih a ni dawn a ni.

Washington chuan kum 20 mi a nih laia a nu dawrah hmeichhe pakhat, Ruth Green-in ram hrang hrangah, mi tam tak hnenah Pathian thu a la hril dawn tih a hrilh thute a sawi chhuak. "Kum 50 hnua Pathian hnathawh hi en teh u. Ka tana hei hi a tih theih chuan, in tan pawh tih theih loh engmah nei lo. Pathian ropui ber rawh se," tiin Pathian leh kohhran tan theihtawp a chhuah tur thu a sawi bawk. A rinna a tih lan chungchanga mipuiten an lo thlir leh sawi zui dan turah pawh engmah hlauh a nei lo tih a sawi zui bawk.